"ဒါဆိုရင် ဒီလျှို့ဝှက်ဆန်းကြယ်တဲ့ အဖွဲ့အစည်းက အလွန်တရာမှကို အန္တရာယ်များတာပေါ့ဗျာ။ သူတို့သာ တွေ့သမျှ သေကောင်ပေါင်းလဲတွေအပေါ်မှာ ဒီလိုအဆောင်တွေ လိုက်တတ်ဆင်ပေးနိုင်တယ်ဆိုရင်များ အုပ်စုလိုက်ကြီး ထိန်းချုပ်ပြီး လုံခြုံဇုန်ကို တိုက်ခိုက်ခိုင်းလို့ ရသွားမှာ မဟုတ်ဘူးလား" အာရှိုး၏ မျက်နှာထားမှာ တင်းမာသွားလေသည်။
"အဲဒီလိုဖြစ်ဖို့တော့ မဖြစ်နိုင်ပါဘူး" ဟိုကိုင်ယွမ် က ခေါင်းခါပြလိုက်သည်။ "ဒီလူက တာအိုပညာကိုပဲ သုံးသည်ဖြစ်စေ၊ စုန်းပညာကိုပဲ သုံးသည်ဖြစ်စေ ဘယ်လောက်အထိ ထိန်းချုပ်နိုင်တယ်ဆိုတဲ့ ကန့်သတ်ချက်တော့ ရှိကိုရှိရမယ်။ ပြီးတော့ ထိန်းချုပ်ရမယ့် ပစ်မှတ်များလေ စွမ်းအင်တွေ ပိုကုန်လေပဲ။ အဲဒီလူရဲ့ စွမ်းအင်တွေ ကုန်ခမ်းသွားတဲ့အခါ ပြန်ပြီး ထိခိုက်ခံစားရတာမျိုး ဖြစ်လာလိမ့်မယ်။ ဆိုလိုတာက သူတို့ထိန်းချုပ်ထားတဲ့ ဇွန်ဘီတွေက သူတို့ကို ပြန်ပြီး သတ်ဖြတ်ကြလိမ့်မယ်ပေါ့"
"ခဏနေဦး၊ ယွမ် လေး။" လောင်ကျန့်ရယ် ၏ စိတ်ထဲသို့ တစ်စုံတစ်ရာ ပေါ်လာဟန် ရှိသည်။ "မင်းပြောတာက လူတစ်ယောက်က ဇွန်ဘီအုပ်စုကြီးကို ထိန်းချုပ်တဲ့အခါ စွမ်းအင်တွေ အများကြီး ကုန်ကျတယ်ဆိုတာလေ။ အဲဒါဆို ဒီလိုထိန်းချုပ်ခံထားရတဲ့ ဇွန်ဘီအုပ်စုထဲမှာ အဆင့်ဆင့် ပြောင်းလဲလာတဲ့ ဇွန်ဘီမျိုး တစ်ကောင်က တိုက်ဆိုင်စွာ ပါလာခဲ့မယ်ဆိုရင်ရော ဘယ်လိုလုပ်မလဲ"
မကြာသေးခင်က လုံခြုံဇုန်၏ သုတေသနဌာနမှ ဇွန်ဘီအမျိုးအစားများကို စုစည်းကာ အဆင့်သတ်မှတ်ချက်များ ခွဲခြားပေးထားခဲ့သည်။ ယခုအချိန်အထိ သေကောင်ပေါင်းလဲအမျိုးအစား အဆင့်လေးဆင့် ရှိနေပြီဖြစ်သည်။
သာမန်ဇွန်ဘီ - လမ်းမများပေါ်တွင် လှည့်လည်သွားလာနေကြသော၊ တောတောင်များထဲတွင် ရှိနေကြသော၊ အဆောက်အအုံများအတွင်း လှည့်ပတ်နေကြသော ဇွန်ဘီအမျိုးအစား ဖြစ်သည်။ ဤအမျိုးအစားကို နေရာတိုင်းတွင် တွေ့မြင်နိုင်သည်။ အနံ့ခံနိုင်စွမ်းနှင့် အကြားအာရုံ အလွန်ကောင်းမွန်ပြီး တိုက်ခိုက်ပုံမှာ အလွန်ရိုးရှင်းသည်။ ကုတ်ဆွဲခြင်း၊ ကိုက်ခဲခြင်းနှင့် အရေအတွက်အသာစီးကို အသုံးချကာ ရန်သူကို ဝိုင်းရံတိုက်ခိုက်တတ်ကြသည်။ အန္တရာယ်အဆင့် သုညကြယ်။ သာမန်လူတစ်ဦးအနေဖြင့် ခေါင်းကိုဖြတ်ထုတ်လိုက်ရုံဖြင့် ၎င်းတို့ကို သတ်နိုင်ပေသည်။
ပထမအဆင့် ပြောင်းလဲလာသောဇွန်ဘီ - သာမန်ဇွန်ဘီအုပ်စုများကြားတွင် တစ်ခါတစ်ရံ တွေ့ရတတ်သည်။ အနံ့ခံနိုင်စွမ်းနှင့် အကြားအာရုံ ကောင်းမွန်သည်။ ခန္ဓာကိုယ်ပိုင်းဆိုင်ရာ တစ်ခုခု (အမြန်နှုန်း၊ အစွမ်းသတ္တိ၊ ခံနိုင်ရည် စသည်ဖြင့်) မှာ ပျမ်းမျှထက် ပိုမိုမြင့်မားသည်။ တိုက်ခိုက်ပုံမှာ ခုန်အုပ်ခြင်း၊ ကုတ်ဆွဲခြင်းနှင့် ကိုက်ခဲခြင်းတို့ ပါဝင်သည်။ အန္တရာယ်အဆင့် တစ်ကြယ်။ တုံ့ပြန်မှုကောင်းမွန်သူတစ်ဦးအနေဖြင့် ခေါင်းကိုဖြတ်ထုတ်ကာ သတ်နိုင်ပေသည်။ (သတင်းရင်းမြစ် ပေးပို့သူ - စီမြို့၏ ရှမ်းလင်း တပ်ဖွဲ့။) [၁]
ဒုတိယအဆင့် ပြောင်းလဲလာသောဇွန်ဘီ - အလယ်အလတ်အရွယ်အစားရှိသော သေကောင်ပေါင်းလဲအုပ်စုထဲတွင် တစ်ကောင်တည်းသာ ပေါ်လာတတ်သည်။ အနံ့ခံနိုင်စွမ်းနှင့် အကြားအာရုံ ကောင်းမွန်သည်။ တုံ့ပြန်မှုအမြန်နှုန်း မြင့်မားသည်။ ပထမအဆင့် ဇွန်ဘီများထက် အမြန်နှုန်း၊ အစွမ်းသတ္တိနှင့် ခံနိုင်ရည် ပိုမိုမြင့်မားပြီး ပိုရှည်သော လက်သည်းများကို ပိုင်ဆိုင်ထားသည်။ တိုက်ခိုက်ပုံမှာ ကုတ်ဆွဲခြင်း၊ ကိုက်ခဲခြင်းနှင့် ချုံခိုတိုက်ခိုက်ခြင်းတို့ ဖြစ်သည်။ အန္တရာယ်အဆင့် နှစ်ကြယ်။ ဤကဲ့သို့သော ဇွန်ဘီနှင့် ရင်ဆိုင်ရသည့်အခါ စဉ်းစားဆင်ခြင်စရာမရှိဘဲ အလောတကြီး လုပ်ဆောင်သင့်ခြင်း မရှိပေ။ စံပြအနေဖြင့် တပ်ဖွဲ့ဝင်များနှင့်အတူ ဝိုင်းရံ၍ စုပေါင်းတိုက်ခိုက်သင့်သည်။ ခန္ဓာကိုယ်မှ ခေါင်းကို ဖြတ်ထုတ်လိုက်ပါက သေဆုံးသွားစေနိုင်သည်။ (သတင်းရင်းမြစ် ပေးပို့သူ - လောင်ကျန့်ရယ်။) [ဇက်မြို့၏ ကားဂိုဒေါင်တွင် သူတို့တွေ့ခဲ့ရသော ဇွန်ဘီမှာ ဒုတိယအဆင့် ဖြစ်သည်။]
တတိယအဆင့် ဇွန်ဘီ - ကြီးမားသော အရွယ်အစားရှိသည့် သေကောင်ပေါင်းလဲအုပ်စုထဲတွင် တစ်ကောင်တည်းသာ ပေါ်လာတတ်သည်။ တိုးတက်လာသော အနံ့ခံနိုင်စွမ်းနှင့် အကြားအာရုံရှိသည်။ အလွန်ကောင်းမွန်သော တုံ့ပြန်မှုအမြန်နှုန်းရှိပြီး တိုက်ခိုက်မှုများကို မည်သို့ကြံစည်ရမည်ကို သိရှိသည်။ အမြန်နှုန်း၊ အစွမ်းသတ္တိနှင့် ခံနိုင်ရည်မှာ ဒုတိယအဆင့်ထက်ပင် ပိုမိုမြင့်မားသည်။ လက်သည်းများ ရှည်လျားပြီး ရိတ်ဓားကဲ့သို့ ထက်မြက်သည်။ တိုက်ခိုက်ပုံတွင် ခုန်အုပ်ခြင်း၊ ကုတ်ဆွဲခြင်း၊ ကိုက်ခဲခြင်းတို့အပြင် ရန်သူကို ဝိုင်းရံရန် သာမန်ဇွန်ဘီများကို ထိန်းချုပ်ခိုင်းတတ်ခြင်းများ ပါဝင်သည်။ မျိုးနွယ်တူများ၏ ဦးနှောက်များကို စားသုံးခြင်းဖြင့် ခန္ဓာကိုယ်ကို ပြန်လည်ပြုပြင်နိုင်စွမ်းရှိသည်။ အန္တရာယ်အဆင့် သုံးကြယ်နှင့် အထက်။ စံပြအနေဖြင့် တပ်ဖွဲ့ဝင်အားလုံးနှင့်အတူ ဝိုင်းရံ၍ စုပေါင်းတိုက်ခိုက်သင့်သည်။ ဦးစွာပထမ လက်နှင့်ခြေထောက် လေးဖက်စလုံးကို ဖြတ်တောက်ပစ်ပြီးမှ ခေါင်းကို ခုတ်ဖြတ်ရမည်။ ဘုန်းကြီးများ သို့မဟုတ် ပုရောဟိတ်များအနေဖြင့် အလောင်းကို ချက်ချင်း မီးရှို့ပစ်ရမည်။ (သတင်းရင်းမြစ် ပေးပို့သူ - အီးမြို့၏ တိုက်ခိုက်ရေးတပ်ဖွဲ့။)
အထူးမျိုးဗီဇပြောင်းလဲထားသော ဇွန်ဘီ - ကြီးမားသော အရွယ်အစားရှိသည့် သေကောင်ပေါင်းလဲအုပ်စုထဲတွင် တစ်ကောင်တည်းသာ ပေါ်လာတတ်သည်။ တွေ့ရှိသည့်နေရာ - ဆေးရုံ။ ခန္ဓာကိုယ်ပိုင်းဆိုင်ရာ အချက်အလက်အားလုံးမှာ တတိယအဆင့် ဇွန်ဘီများထက် ပိုမိုသန်မာသည်။ ကြီးမားလှသော ဖျက်ဆီးနိုင်စွမ်း ရှိသည်။ လက်သည်းရှည်ကြီးများမှာ ရိတ်ဓားကဲ့သို့ ထက်မြက်ပြီး အလွန်တရာမှ ခံနိုင်ရည်ကောင်းမွန်ကာ ကာကွယ်ရေးစွမ်းအင်ကွက်များကိုပင် ဖောက်ထွင်းဖြတ်တောက်နိုင်စွမ်း ရှိသည်။ ထက်မြက်သော သွားများအပြည့်ရှိသော ပါးစပ်ကို ပိုင်ဆိုင်ထားသည်။ ခေါင်းကို ခန္ဓာကိုယ်နှင့် ဖြတ်ထုတ်ထားလျှင်ပင် ဆက်လက်ရွေ့လျားနိုင်စွမ်း ရှိသေးသည်။ အန္တရာယ်အဆင့် - အလွန်မြင့်မားသည်။ ထိခိုက်ဒဏ်ရာရသည်အထိ သို့မဟုတ် သေဆုံးသည်အထိ ရန်သူကို မရပ်မနား လိုက်လံတိုက်ခိုက်လိမ့်မည်။ သတ်ရမည့်နည်းလမ်း - ခေါင်းဖြတ်ပြီး ဝိညာဉ်မီးဖြင့် ချက်ချင်း မီးရှို့ပစ်ရမည်။ (သတင်းရင်းမြစ် ပေးပို့သူ - လောင်ကျန့်ရယ်။)
"ပြောချင်တာက ဒီလူဟာ တတိယအဆင့် သို့မဟုတ် အဲဒီထက် မြင့်တဲ့ဇွန်ဘီကို ထိန်းချုပ်ထားပြီး အဲဒီကတစ်ဆင့် သာမန်ဇွန်ဘီတွေကိုပါ ထိန်းချုပ်နေတာပေါ့ လို့ ဆိုလိုတာလား" ဟိုကျန့်ဟုန်က လောင်ကျန့်ရယ် ကို ကြည့်လိုက်သည်။
ဘီအခြေစိုက်စခန်း၏ တပ်မှူးတစ်ဦးအနေဖြင့် သူသည် ဇွန်ဘီများနှင့် ပတ်သက်သည့် အချက်အလက်မှန်သမျှကို သဘာဝကျကျပင် မှတ်သားထားခဲ့သည်။
"မှန်တယ်။" လောင်ကျန့်ရယ် က ခေါင်းညိတ်ပြလိုက်သည်။ "မင်းတို့က တတိယအဆင့် ဇွန်ဘီတစ်ကောင်ကို မထင်မှတ်ဘဲ နှိမ်နင်းနိုင်ခဲ့တယ်၊ ဒါကြောင့်လည်း ဒီအဆောင်ကို ရရှိခဲ့တာပေါ့။"
ကိုးကားချက်များ -
[1] ရှမ်းလင်း (Shan Ling) = တောင်တန်းကျောရိုး