"ဘာမှမဟုတ်ပါဘူး။ လူကြီးမင်းကို ကျုပ်တို့ရဲ့ စွမ်းရည်ရှင်တွေ လေ့ကျင့်တဲ့ကွင်းဆီ ဧည့်သည်တော်တစ်ယောက်အဖြစ် ဖိတ်ခေါ်ချင်ရုံသက်သက်ပါပဲ။"
"ငါသာ ငြင်းဆိုခဲ့ရင်ရော..."
"မင်း ငြင်းမှာမဟုတ်ပါဘူး။" ဟယ်လင်မင်း၏ မျက်လုံးများထဲတွင် ရက်စက်ကြမ်းကြုတ်သော အလင်းရောင်တစ်ခု ဖြတ်ပြေးသွားသည်။ သူက လက်ကို ယမ်းလိုက်သည်နှင့် ရေစီးကြောင်းတစ်ခု ပေါ်ထွက်လာပြီး ဟိုကိုင်ယွမ် ထံသို့ ဦးတည်ကာ ပစ်ခတ်လာလေသည်။
ဟိုကိုင်ယွမ် သည် အမြန်ဆုတ်ခွာလိုက်ပြီး ဘယ်ဘက်လက်ချောင်းများကို တစ်ချက်တောက်လိုက်၏။ ငွေရောင်အလင်းတန်း လက်ခနဲ ဖြစ်သွားသည်နှင့် သန့်ရှင်းသောနဂါးအရိုးစုတ်တံ ပေါ်လာသည်။ ထိန်းချုပ်ခံထားရသော ရေစီးကြောင်း နီးကပ်လာသည်နှင့်အမျှ စုတ်တံက ရှေ့သို့တိုးထွက်ကာ တည့်တည့်ရင်ဆိုင်လိုက်သည်။ ဟိုကိုင်ယွမ် သည် မိမိ၏အတွင်းဝိညာဉ်စွမ်းအင်ကို ဆွဲထုတ်လိုက်ရာ စုတ်တံမွှေးများမှတစ်ဆင့် ကာကွယ်ရေးအကာအရံတစ်ခု ဖြစ်ပေါ်လာပြီး ထိုရေစီးကြောင်းကို တားဆီးလိုက်လေသည်။
ငွေရောင်အကာအရံနှင့် အရှိန်ပြင်းပြင်း တိုက်မိစဉ် ရေများ ပေါက်ကွဲထွက်သွားခြင်းကို အခွင့်ကောင်းယူကာ ဟိုကိုင်ယွမ် သည် တစ်ချိန်တည်းမှာပင် စုတ်တံကို ပျောက်ကွယ်စေလျက် နောက်သို့ ခြေလှမ်းအနည်းငယ် ပိုဆုတ်လိုက်သည်။
ဝိညာဉ်စွမ်းအင်ကို အသုံးပြု၍ ဤကဲ့သို့ နဂါးအရိုးစုတ်တံကို ထိန်းချုပ်သည့်နည်းလမ်းမှာ လွန်ခဲ့သောနှစ်ရက်ကမှ သူ ရှာဖွေတွေ့ရှိခဲ့သော စွမ်းရည်တစ်ခုဖြစ်သည်။ အမှန်အတိုင်းပြောရလျှင် သူ၏ဘိုးဘေးထံ မဆက်သမီ အိပ်မက်ထဲတွင် အနက်ရောင်ဝတ်ရုံနှင့်လူက စုတ်တံကို ဆင့်ခေါ်နေသည်ကို မြင်တွေ့ရခြင်းမှ အကြံဉာဏ်ရယူခဲ့ခြင်းပင်တည်း။ ထိုလှုပ်ရှားမှုမှာ ရိုးရှင်းသော်လည်း အလွန်ပင် ထိရောက်လှသည်။
ထို့နောက်တွင် သူစမ်းသပ်ကြည့်ရာ စုတ်တံကို အချိန်တိုအတွင်း တစ်ဖိတ်ဖိတ်လက်ခနဲ ဆင့်ခေါ်နိုင်ရုံသာမက မိမိ၏ဝိညာဉ်စွမ်းအင်ကိုပါ ထည့်သွင်းကာ ခံစစ်ဆိုင်ရာနည်းစနစ်များကို ထုတ်လွှတ်ရာတွင် ကြားခံပစ္စည်းတစ်ခုအနေဖြင့် အသုံးပြုနိုင်ကြောင်းကိုပါ တွေ့ရှိခဲ့ရသည်။ သဘာဝကျကျပင် သူသည် ဤစွမ်းရည်ကို သုံးရာတွင် ကျွမ်းကျင်လှသည်တော့ မဟုတ်ပေ။ ထိုမျှသာမက သူ၏စစ်မှန်သောစွမ်းရည်များကို မည်သူ့ကိုမျှ မမြင်စေလိုသောကြောင့် ရေပေါက်ကွဲမှုကြောင့် လူတိုင်းအာရုံလွဲနေချိန်တွင် စုတ်တံကို ဖျောက်ဖျက်ပစ်ခဲ့ခြင်းဖြစ်သည်။ တစ်ဖက်လူက သူ့ကိုလည်း စွမ်းရည်ရှင်တစ်ဦးဟူ၍ ထင်မှတ်သွားစေရန် လှည့်စားနိုင်ခြင်းက သူ့အတွက် အလွန်တရာ ကျေနပ်စရာပင် ဖြစ်နေသည်။
"တကယ်ကို သိပ်ကောင်းတာပဲ။ လောင်ကျန့်ရယ် ကို ငါ အထူးမုန်းတီးပေမဲ့ လူတွေရဲ့အလားအလာကို မြင်နိုင်စွမ်းရှိတဲ့ သူ့ရဲ့ထူးခြားတဲ့စွမ်းရည်ကိုတော့ ငါ ငြင်းလို့မရဘူး။" ဟယ်လင်မင်း၏ မျက်နှာအမူအရာမှာ ယခုအခါ စိတ်လှုပ်ရှားလွန်းသဖြင့် ကြည်နူးမှုတို့ လွှမ်းခြုံနေတော့သည်။ ဟိုကိုင်ယွမ် အဖြေပေးသည်ကိုပင် မစောင့်ဘဲ လက်နှစ်ဖက်ကို မြှောက်လိုက်၏။ ရေတိုင်နှစ်ခုက လူငယ်လေးဆီသို့ နှစ်ဖက်စလုံးမှ အပြေးအလွှား တိုးဝင်လာကြသည်။ "ဒီတစ်ခါ ဘယ်လိုကာမလဲဆိုတာ ကြည့်ရသေးတာပေါ့!"
ဟိုကိုင်ယွမ် က ထိုရေစီးကြောင်းနှစ်ခုကို တစ်ချက်ကြည့်လိုက်ရင်း အပြုံးယဲ့ယဲ့လေး ပြုံးလိုက်သည်။
သူ့ကိုယ်သူ ငွေရောင်အလင်းတန်းတစ်ခုနှင့်အတူ ပျောက်ကွယ်သွားစေသဖြင့် ထိုတိုက်ခိုက်မှုများမှာ အလဟဿဖြစ်ကာ နေရာလွတ် (Dimension) ကိုသာ ရိုက်ခတ်မိသွားသည်။ ရေတို့သည် မြေပြင်ပေါ်သို့ အဟုန်ပြင်းပြင်းဖြင့် ကျရောက်ပေါက်ကွဲသွားပြီး အနီးအနားရှိ လူတိုင်း၏အပေါ်သို့ ရေစက်မိုးဖွဲများသကဲ့သို့ ကျဆင်းလာစေသည်။
ငွေရောင်အလင်းတန်း နောက်တစ်ကြိမ် လင်းလက်သွားပြီးနောက် ဟိုကိုင်ယွမ် သည် ဧရာမရေအိုင်ကြီး၏ နောက်ဘက်တွင် ပေါ်လာခဲ့ပြီး သူ၏ဝတ်စုံပေါ်တွင် ရေစက်တစ်စက်မျှပင် မစိုစွတ်ပေ။
"ဘယ်လို... ဘယ်လိုလုပ် ဖြစ်နိုင်မှာလဲ။" ဟယ်လင်မင်းက အံ့သြတုန်လှုပ်လွန်း၍ စကားပင်ထစ်သွားကာ မျက်လုံးအပြည့်ကျယ်လျက် မေးလိုက်သည်။ "မင်း ဘာတွေလုပ်လိုက်တာလဲ။"
"ငါ ဘာလုပ်တယ်လို့ ထင်လို့လဲ။" ဟိုကိုင်ယွမ် က အပြစ်ကင်းဟန်ဆောင်ကာ လက်နှစ်ဖက်ကို ဖြန့်လိုက်သည်။
သူသည် ဟယ်လင်မင်းနှင့် လက်တွေ့တိုက်ပွဲဝင်ရန် လုံးဝဆန္ဒမရှိပေ။ သူကိုယ်တိုင်က လက်ချင်းယှဉ်တိုက်ခိုက်ရသည့် အနီးကပ်တိုက်ပွဲများတွင် မကျွမ်းကျင်ရုံသာမက တစ်ဖက်လူမှာ J အခြေစိုက်စခန်း၏ ခေါင်းဆောင်ဖြစ်ပြီး လောင်ကျန့်ရယ် ၏ အသိအမှတ်ပြုခံထားရသော အဓိကရန်သူလည်း ဖြစ်ပေသည်။ ဆိုလိုသည်မှာ တစ်ဖက်လူ၏ တိုက်ခိုက်ရေးစွမ်းရည်များမှာ အလွန်အမင်း ထူးချွန်ထက်မြက်နေမည် ဖြစ်ပေသည်။ ထိုမျှသာမက ယခုအခါတွင် သူသည်လည်း စွမ်းရည်ရှင်တစ်ဦး ဖြစ်နေပြီ မဟုတ်ပါလော။
ဟိုကိုင်ယွမ် ကို စိုက်ကြည့်ရင်း ဟယ်လင်မင်းက တိုက်ခိုက်ရန် ပြင်ဆင်ထားသည့်အနေအထားမှ တဖြည်းဖြည်း ပြေလျော့သွားကာ လက်ကိုယမ်းယမ်းပြလိုက်ပြီး မြေပြင်ပေါ်ရှိ စစ်သားသုံးဦးကို လွှတ်ပေးရန် သူ့လက်အောက်ငယ်သားများကို အချက်ပြလိုက်သည်။
"ဟဟ... စိတ်ဝင်စားစရာပဲ။ တကယ်ကို အလွန်တရာ စိတ်ဝင်စားစရာပဲ။ လူငယ်လေး၊ မင်းကို ငါ စိတ်ဝင်စားသွားပြီ။ ပြန်သွားပြီး လောင်ကျန့်ရယ် ကို ပြောလိုက်ပါ၊ ငါ့မျက်စိကျသွားပြီလို့။ သွားကြစို့!" ဤသို့ပြောဆိုပြီးနောက် သူလှည့်ထွက်သွားကာ လက်အောက်ငယ်သားများနှင့်အတူ ထွက်ခွာသွားတော့သည်။