"ဟိုဘက်မှာလည်း တိုက်ပွဲစနေကြပြီပေါ့လေ။"
မဂ်နီက မုန်တိုင်းတစ်ခု၏ ဗဟိုချက်လိုမျိုး ဝေ့ဝဲနေသည့် အဝေးက မည်းမှောင်နေသော တိမ်တိုက်များကို ငေးကြည့်ရင်း Mjolnir ကို တင်းတင်းကျပ်ကျပ် ဆုပ်ကိုင်လိုက်သည်။
"ငါတို့လည်း စသင့်ပြီ မဟုတ်လား။"
"ငါ့ကို လာပြောစရာမလိုပါဘူး။" ကွမ်ဂျီအာ က မဂ်နီဆီကနေ အကြည့်မခွာဘဲ ပြန်ဖြေလိုက်သည်။
သူ့ဆီကနေ အချိန်အတော်ကြာအောင် ထွက်ပေါ်နေသည့် ဖိနှိပ်မှုပြင်းထန်သော စွမ်းအားများကြောင့် သူမမှာ တစ်ခဏလေးတောင် အသက်ရှူချောင်အောင် မနေနိုင်ခဲ့ပေ။
သူ့မျက်နှာမှာ အပြုံးတစ်ခုရှိနေသော်လည်း သူ့မျက်လုံးများကတော့ ပြုံးမနေခဲ့။
သူမ အာရုံလွှတ်လိုက်သည်နှင့် Mjolnir ဟာ သူမ၏ ခေါင်းကို တည့်တည့်ချိန်ရွယ်လာမည်မှာ အသေအချာပင်။
"ငါ ဒါကို စောင့်မျှော်နေခဲ့တာ။ ကြာပြီလို့ ထင်ထားခဲ့တဲ့ ဖန်ရီရဲ့ စွမ်းအားကို မင်းက ဘယ်လောက်အထိ အမွေဆက်ခံထားလဲဆိုတာ သိချင်မိတယ်။ အဲဒီမျိုးရိုးကို တကယ်ရထားတာဆိုရင်တော့ ငါ့ကို လုံလောက်အောင် ဖျော်ဖြေပေးနိုင်မှာပါ၊ ဟုတ်တယ်မလား။"
"အဲဒီတုန်းက မင်း အဲဒီလောက်နဲ့တင် မလုံလောက်လို့ ထွက်ပြေးခဲ့ရတာ မဟုတ်ဘူးလား။"
"ဟေ့... အဲဒါကတော့ ငါ ပြင်ပြောနေစရာတောင် မလိုတဲ့ အကြောင်းအရာပဲ။ အဲဒီတုန်းက တိုက်ပွဲထဲ ဝင်နှောင့်ယှက်ခဲ့တာ မင်းလေ။ ငါက အရင်ကတည်းက လုပ်စရာကိစ္စရှိနေတာ။"
မဂ်နီက သူသာ မဟုတ်လျှင် ထွက်ပြေးစရာ မလိုဘူးဆိုသည့်အကြောင်းကို သူ့၏ မကျေနပ်ချက်နှင့်အတူ ပွင့်ပွင့်လင်းလင်း ထုတ်ဖော်ပြောဆိုလိုက်သည်။
"ယူးဟွန်းရဲ့ တိုက်ပွဲထဲ အရင်ဝင်နှောင့်ယှက်ခဲ့တာ မင်းမဟုတ်ဘူးလား။"
"သူလုပ်နေတာကို တိုက်ပွဲလို့ ခေါ်လို့ရရင်ပေါ့။"
"တကယ်လား။ အဲလောက်အထိ ဖြစ်နေတာကို မင်းက မင်းရဲ့ လက်အောက်ငယ်သားတွေကို အများကြီး ခေါ်လာခဲ့တာ မဟုတ်ဘူးလား။"
ကွမ်ဂျီအာ က မဂ်နီ၏နောက်မှာ တန်းစီရပ်နေသည့် အဝေးက အက်စ်ဂတ် စစ်သည်များကို ကြည့်ရင်း မဲ့ပြုံးပြုံးလိုက်သည်။
သူမစကားကြောင့် မဂ်နီက သက်ပြင်းရှည်ကြီးတစ်ခု ချလိုက်ပြီး Mjolnir မကိုင်ထားသည့် လက်ဝဲဘက်လက်နှင့် သူ့ခေါင်းကို ကြမ်းကြမ်းတမ်းတမ်း ကုတ်လိုက်သည်။
"သူတို့က ဒီတိုက်ပွဲထဲ ပါလာမှာမဟုတ်ဘူး။ စပြောရရင် ငါတစ်ယောက်တည်းဆိုရင်ကို လုံလောက်နေပြီ။"
"မောက်မာလိုက်တာ။"
"မင်းရဲ့ အဆင့်နဲ့ဆိုရင် အက်စ်ဂတ် ရဲ့ စစ်သည်တွေ အယောက်နည်းနည်းလောက် ဝင်လာရုံနဲ့ ပျက်စီးမှုတွေ ပိုများလာမှာပဲ။ အဲဒီကောင်တွေက မမျှော်လင့်ထားတဲ့ အခြေအနေတွေအတွက် အာမခံသက်သက်ပါ။"
"မမျှော်လင့်ထားတဲ့ အခြေအနေ ဟုတ်လား။ မင်းက တစ်ခုခု ထပ်ဖြစ်လာတော့မယ်လို့ မျှော်လင့်နေသလိုမျိုး ပြောနေတာပဲ။"
"အင်းလေ၊ အဲဒါက သဘာဝပဲ။"
မဂ်နီက လက်ရှိဖြစ်နေသည့် စစ်ပွဲနှင့် လုံးဝမသက်ဆိုင်သည့်ဘက်ကို အကြည့်လွှဲရင်း ရယ်မောလိုက်သည်။
"မင်းတို့တွေကတော့ သိမှာမဟုတ်သေးဘူး၊ ဒါပေမဲ့ ငါတော့ ခံစားမိတယ်။ အိုလံပတ်က ကောင်တွေက ဒီအခွင့်အရေးကို အမိအရ ဖမ်းဆုပ်ဖို့ ဆုံးဖြတ်ထားပုံရတယ်။ ဘာလို့လည်းဆိုတော့ သူတို့က 'သူ့' ကို ခေါ်ထုတ်လာခဲ့လို့ပဲ..."
"ဘာ။"
"ထားပါတော့၊ ငါ့ဘာသာ တွေးမိတာပါ။ အခုအရေးကြီးတာက အဲဒါမဟုတ်ဘူး။"
မဂ်နီက Mjolnir ကို ပြန်ကိုင်လိုက်ပြီး ရယ်မောလိုက်သည်။
"တကယ့် တိုက်ပွဲကို စကြရအောင်၊ မဟုတ်ဘူးလား။"
ကွိုရန်း!
တောက်ပသည့် လျှပ်စီးတန်းများက Mjolnir ထဲမှာ စီးဆင်းနေပြီး မဂ်နီ၏ ခန္ဓာကိုယ်ပတ်လည်မှာ ဝေ့ဝဲနေသည်။
တစ်ချိန်တည်းမှာပင် ကွမ်ဂျီအာ က သူမ၏ စွမ်းအားများကို အကုန်ထုတ်လွှတ်လိုက်သည်။ သူမ၏ နောက်ကွယ်မှာ ခရမ်းရောင် အော်ရာများ တဖျပ်ဖျပ်လက်နေပြီး ဧရာမ ဝံပုလွေကြီးတစ်ကောင်၏ ပုံစံအဖြစ် ပြောင်းလဲသွားသည်။
တစ်ပြိုင်နက်တည်းမှာပင် သူမ ဆောင်းထားသည့် ခေါင်းစွပ်ကို နောက်ကို လှန်ချလိုက်ရာ သူမ၏ ဝံပုလွေနားရွက်များကို မြင်လိုက်ရသည်။
"ငါ မင်းခေါင်းကို ရိုက်ချေပစ်မယ်။"
"ငါ မင်းလည်ချောင်းကို ဆွဲဖြဲပစ်မယ်။"
* * *
"တိုက်ပွဲ စတင်ပြီ။"
မင်းသား ပက်ထရစ်က မုန်တိုင်းတိမ်တိုက်များ၏ အထက်ဘက်ကို ဆုတ်ခွာသွားသည့် လေယာဉ်ပျံပေါ်ကနေ နောက်ကိုလှည့်ကြည့်ရင်း တိုးတိုးလေး ရေရွတ်လိုက်သည်။
သူ့နောက်မှာတော့ မှော်တပ်ဖွဲ့၏ အယ်လ်ဖာအဖွဲ့က စနစ်တကျ တန်းစီရပ်နေကြသည်။
ပက်ထရစ်ကိုယ်တိုင်လည်း ချွင်းချက်မရှိပေ။ လုံခြုံရေးကို ဦးစားပေးသူဖြစ်သည့်အတိုင်း သူ့ခေါင်းမှလွဲ၍ တစ်ကိုယ်လုံးကို မှော်ပစ္စည်းများဖြင့် ဖုံးအုပ်ထားသည်။
"ငါတို့ရဲ့ တာဝန်က ဘာလဲဆိုတာ သိတယ်မလား။"
တပ်ဖွဲ့ဝင်များဆီက အသံထွက်မလာသော်လည်း သူတို့၏ တိတ်ဆိတ်မှုကနေပဲ ပက်ထရစ်က အဖြေကို ရလိုက်သည်။
သူတို့၏ တာဝန်ကတော့ စစ်ပွဲဖြစ်ပွားနေစဉ်အတွင်း ဆာလီယိုအင်ပါယာကို ပုန်ကန်ဖို့ ကြံစည်နေသည့် မဟာမိတ်အဖွဲ့၏ အဓိက အချက်အချာကို ချေမှုန်းဖို့ဖြစ်သည်။
ရန်သူ့တပ်ဖွဲ့များ၏ အဓိက အင်အားစုများ၊ ဘုရင်များကအစ အဆင့်မြင့်သတ္တဝါများအထိ စစ်ပွဲမှာ အာရုံစိုက်နေကြချိန်မှာ တိုက်ခိုက်နိုင်စွမ်းမရှိသူများသာ အခြေစိုက်စခန်းမှာ ကျန်ရစ်ခဲ့ကြသည်။
အကယ်၍ သူတို့သာ မဟာမိတ်အဖွဲ့၏ အဓိကပုဂ္ဂိုလ်များကို ချေမှုန်းနိုင်မည်ဆိုလျှင် ရန်သူများသည် စစ်ပွဲကို ဆက်လက်ဆင်နွှဲဖို့ လိုအပ်သည့် အဓိက မောင်းနှင်အားကို ဆုံးရှုံးသွားလိမ့်မည်။
တစ်နည်းအားဖြင့် သူတို့၏ လုပ်ဆောင်ချက် အမြန်နှုန်းက စစ်ပွဲ၏ ရလဒ်ကို ဆုံးဖြတ်ပေးသွားနိုင်သည်။
ပက်ထရစ်က လေထဲမှာ ဟိုလိုဂရမ်မြေပုံတစ်ခုကို ဖွင့်လိုက်သည်။
"မြေပြင်အနေအထားကို ငါတို့ ခွဲခြမ်းစိတ်ဖြာပြီးပြီ။ အားလုံးပဲ အကောင်းဆုံး လမ်းကြောင်းကို မှတ်သားထားကြ။"
"မင်းသား၊ အထဲမှာ ရှိနေတဲ့သူတွေကရော။"
"ငါ ထပ်ရှင်းပြဖို့ လိုသေးလို့လား။ သူတို့က ငါတို့ ဆာလီယိုအင်ပါယာရဲ့ သူပုန်တွေပဲ။ အကုန်လုံးကို သတ်ပစ်ကြ။ တစ်ယောက်မှ အရှင်မထားနဲ့။"
တွန့်ဆုတ်ခြင်း သို့မဟုတ် ငြင်းဆန်ခြင်း လုံးဝမရှိ။
မှော်တပ်ဖွဲ့၏ အယ်လ်ဖာအဖွဲ့ဆိုတာ ဒီလိုမျိုးပဲပေါ့ဟု ပက်ထရစ်က ပြင်ဆင်မှုများ ပြီးဆုံးချိန်မှာ တွေးလိုက်သည်။
ပက်ထရစ်နှင့် မှော်တပ်ဖွဲ့ဝင်များဟာ Drop Pod များထဲကို ဝင်ရောက်သွားပြီး တစ်စီးကို လေးယောက်စီ ခွဲလိုက်ကြသည်။ ခဏအကြာမှာ Pod များက ဆိုင်လိုများထဲကို ရွေ့လျားသွားသည်။
တစ်ချိန်တည်းမှာပင် လေယာဉ်ပျံကြီး၏ ဧရာမအမြောက်များက မြေပြင်ကို ချိန်ရွယ်လိုက်သည်။
ထန်း! ထန်း! ထန်း!
အမြောက်များက Drop Pod များကို ပစ်လွှတ်လိုက်ပြီး မြေပြင်ဆီသို့ လေကြောင်းမှတစ်ဆင့် ဆင်းသက်စေလိုက်သည်။
Pod များက မြေပြင်ကို ဒေါင်လိုက် ထိုးဆင်းသွားပြီး မြေကြီးကို ဖောက်ထွက်ကာ မြေအောက်ပိုင်းဆီသို့ နက်ရှိုင်းစွာ စိုက်ဝင်သွားသည်။
"မြေပြင်ပေါ်မှာတော့ ကြောက်မက်ဖွယ်ရာတွေ ဖြစ်ပျက်နေတာပဲ။"
ပက်ထရစ်က ယူးဟွန်း အသုံးပြုခဲ့သည့် ဒြပ်စင်ကျောက်တုံးသုံးခုကြောင့် ဖြစ်ပေါ်လာသည့် ကြီးမားသည့် သဘာဝဘေးအန္တရာယ်ကို ဖောက်ထွင်းမြင်ရသည့် အကာအရံတစ်ခုကနေ ခဏတာ မြင်လိုက်ရသောကြောင့် တုန်လှုပ်သွားသည်။
ဘုရင်များလို့ ခေါ်ဆိုကြသည့် သတ္တဝါများ၏ တိုက်ပွဲဆိုတာ ဒီလောက်တောင် ပြင်းထန်တာပဲ။ သူကတော့ ဒီထဲကို ဝင်ပါဖို့ မပြောနှင့်၊ ဒီ ဒဏ္ဍာရီဆန်သည့် စစ်ပွဲကို ဆက်ကြည့်ဖို့တောင် ရဲစိတ်မရှိပေ။
'ဟုတ်တယ်၊ ငါတို့ လုပ်နိုင်တာကိုပဲ လုပ်ရမယ်။'
Pod များက သူတို့၏ ပန်းတိုင်ကို မရောက်မချင်း မြေအောက်ကို ဆက်လက်တူးဖော်သွားသည်။
ကောင်းစွာ လေ့ကျင့်ထားသည့် မှော်စစ်သည်များက လျင်မြန်စွာ ဆင်းသက်ပြီး ပတ်ဝန်းကျင်ကို စစ်ဆေးလိုက်ကြသည်။
သူတို့၏ အစောင့်အရှောက်များနှင့်အတူ ရှိနေသည့် ပက်ထရစ်က အမိန့်ပေးလိုက်သည်။
"အားလုံးကို သတ်ပစ်ကြ။"
* * *
ယူးဟွန်းက ဒီအိုရာကာနှင့် ထိပ်တိုက်တွေ့ဆုံနေသည်။
မြေပြင်အလွှာများ ပြောင်းပြန်လှန်ပြီး ဧရာမအပင်များ ပေါက်ထွက်လာကာ မည်းမှောင်နေသည့် တိမ်တိုက်များကနေ မိုးများ မရပ်မနား ရွာသွန်းနေသည့် ကပ်ဘေးဆန်သည့် မြေပြင်ပေါ်မှာ သူတို့နှစ်ယောက်ဟာ တစ်ယောက်၏ လှုပ်ရှားမှုကို တစ်ယောက် အာရုံစိုက်နေကြသည်။
ဒီအိုရာကာ၏ လက်က ဝါးတားတား ဖြစ်သွားသည်။ ယူးဟွန်းက သူ့ခေါင်းကို ချက်ချင်း နောက်ကို ဆုတ်လိုက်သည်။ ကြီးမားသည့် ဓားချက်တစ်ခုက သူ့ခေါင်းထိပ်ကို ဖျတ်ခနဲ ဖြတ်သွားပြီး သူ့နောက်က မြေပြင်ကို ထောင့်ဖြတ် ဖြတ်တောက်သွားသည်။
ဒီအိုရာကာ၏ တိုက်ခိုက်မှုများက အဲဒီလောက်နဲ့ မပြီးဆုံး။ သူ့၏ စိတ်ဆန္ဒက ကမ္ဘာကြီးနှင့် ပဲ့တင်ထပ်သွားပြီး သူ့ပတ်လည်မှာ ဓားချက်ပေါင်းများစွာကို ထုတ်လွှတ်လိုက်သည်။
ယူးဟွန်းကတော့ မတုန်လှုပ်ဘဲ 'ခုနစ်ပါးသော နတ်ဆိုးမည်းကောင်းကင် အနုပညာ' ၏ စွမ်းအားနှင့် ဒီအိုရာကာ၏ တိုက်ခိုက်မှုများကို ကာကွယ်လိုက်၊ ပြန်တိုက်လိုက် လုပ်နေနိုင်ပြီး တစ်ခါတစ်ရံမှာတော့ ပြန်လည်တုံ့ပြန်တိုက်ခိုက်နိုင်သည်အထိ ဖြစ်နေသည်။
ယူးဟွန်းက အဲဒီလောက်နဲ့ မရပ်တန့်သေး။ သူက ဒက်စ်ကာ့တ်၏ စွမ်းအားကို အသုံးပြုပြီး သူ့ပတ်လည်မှာ ဒီအိုရာကာကို ဝေဝါးသွားစေဖို့အတွက် ထင်ယောင်ထင်မှား ရုပ်ပုံများ အများအပြားကို ဖန်တီးလိုက်သည်။
"အသုံးမကျတဲ့ လှည့်ကွက်တွေပဲ။"
"စမ်းကြည့်မှ သိမှာပေါ့။"
သူတို့၏ ခန္ဓာကိုယ်များက တိုက်ရိုက် ထိပ်တိုက်တွေ့ဆုံသွားသည်။ ဒီအိုရာကာ၏ ဓားနှင့် ယူးဟွန်း၏ *ဘဲ့ရျွန်း* (ကြာဖြူ) တို့က အင်အားချင်း ယှဉ်ပြိုင်နေကြသည်။
ဒီအိုရာကာက *ဘဲ့ရျွန်း* ကို မြင်လိုက်ရသည့်အခါ သူ့မျက်လုံးများ ပြူးကျယ်သွားသည်။
"ဒါကို ဘယ်က ရတာလဲ။"
"မင်းနဲ့ ဘာဆိုင်လို့လဲ။"
"မင်း ဒါကို နန်းတွင်းမိသားစုဆီက ခိုးလာတာလား။"
"မင်း ပြောပုံက ပိုင်ရန်နဲ့ တူလိုက်တာ။"
ပိုင်ရန်၏ နာမည်ကို ကြားလိုက်ရသည့်အခါ ဒီအိုရာကာ၏ မျက်ခုံးများ တွန့်ချိုးသွားသည်။
"အဲဒီနာမည်ကို ပါးစပ်ကနေ ထုတ်မပြောနဲ့!"
"သူက မင်းရဲ့ ချစ်လှစွာသော တပည့်မလေး ဖြစ်နေလို့လား။"
ယူးဟွန်းက အချက်အချာကျသည့် နေရာကို တည့်တည့် ထိမှန်အောင် ပြောလိုက်သည်။ ဒီအိုရာကာက သွားများကို ကြိတ်လိုက်ပြီး ယူးဟွန်းကို အင်အားသုံးပြီး တွန်းဖယ်ဖို့ ကြိုးစားလိုက်သည်။ သို့သော်လည်း သူ့ခန္ဓာကိုယ်ကသာ နောက်ကို ပြန်တွန်းထုတ်ခံနေရတာကို သူ တဖြည်းဖြည်း သဘောပေါက်သွားသည်။
'ဒီလောက်အထိ ကြောက်မက်ဖွယ်ကောင်းတဲ့ အင်အားက ဘာလဲ...?!'
သူက ဓားကို ကိုင်တွယ်လာခဲ့တာ နှစ်ပေါင်းများစွာ ကြာခဲ့ပြီ။ တစ်ခါမှလည်း လက်ထဲကနေ ဓားကို စွန့်လွှတ်ခဲ့ဖူးသူ မဟုတ်။ သို့သော်လည်း ယခုတော့ သူ့ထက် အသက်ငယ်ရွယ်သူ ယူးဟွန်း၏ အင်အားအောက်မှာ သူ အသာစီးမရဘဲ ဖြစ်နေရသည်။ ဒီအချက်ကို သူ ယုံကြည်ဖို့တောင် ခက်ခဲနေမိသည်။
ဒီအိုရာကာက သူ့၏ ဒေါသကို ခဏတာ ချိုးနှိမ်ဖို့ ဆုံးဖြတ်လိုက်သည်။ ဒီလူက သူ့၏ တပည့်မလေးကို သတ်ခဲ့သည့် ရန်သူဖြစ်သော်လည်း စိတ်လိုက်မာန်ပါ တိုက်ခိုက်လို့တော့ မဖြစ်။ ယူးဟွန်း၏ ကျွမ်းကျင်မှုများက အလွန်တရာ ကြောက်ခမန်းလိလိ ဖြစ်နေသောကြောင့်ပင်။
ပိုင်ရန်ဆိုတာ ဆာလီယိုအင်ပါယာ၏ အင်အားစုများထဲမှာ အားအနည်းဆုံးလို့ သတ်မှတ်ခံထားရပေမဲ့ သူမကလည်း အင်အားစုဝင် တစ်ယောက် ဖြစ်နေဆဲပင်။ ယူးဟွန်းက သူမကိုတောင် အနိုင်ယူခဲ့သည်။ ချွဲဒိုယွန်း ဆိုသည့် ဓားသခင်ကိုတောင် ယူးဟွန်းက အနိုင်ယူခဲ့တယ်ဆိုသည့် သတင်းစကားများတောင် ရှိနေသေးသည်။
‘ကောင်းကင်နတ်ဆိုးကလည်း မရှိတော့၊ ဓားသခင်ကလည်း ဒဏ်ရာရထားချိန်မှာ ငါတို့ အနိုင်ရဖို့ အကောင်းဆုံးအချိန်ပဲလို့ ထင်ခဲ့တာ။ ဒါပေမဲ့ ဒီလူက ဘယ်ကနေ ရောက်လာတာလဲ။’
ဒီအိုရာကာက ယူးဟွန်း၏ အထောက်အထားကို မသိသေးပေ။ သူ မသိသလို သိချင်စိတ်လည်း မရှိ။
ဒီအိုရာကာက သူ့၏ 'အာရုံ' (Intent) ကို စုစည်းလိုက်သည်။ သူ့ပတ်လည်မှာ 'အာရုံ' ၏ စွမ်းအားကို နိုးထထားသူများသာ မြင်နိုင်သည့် စစ်တပ်တစ်ခု ပေါ်ပေါက်လာသည်။
"စစ်သည်တွေကို ခေါ်နေတာလား။"
"သူတို့က ငါနဲ့အတူ တိုက်ပွဲဝင်ခဲ့ဖူးတဲ့ ငါ့ရဲ့ ရဲဘော်တွေပဲ။"
"မကြာခင် မင်းလည်း သူတို့နဲ့အတူ ပူးပေါင်းရတော့မှာပါ။"
ယူးဟွန်း၏ လှောင်ပြောင်စကားကို ဒီအိုရာကာက တုံ့ပြန်ခြင်းမရှိ။ 'အာရုံ' များနှင့် ဖန်တီးထားသည့် စစ်သည်များက ယူးဟွန်းဆီကို အရပ်မျက်နှာပေါင်းစုံကနေ ပြေးဝင်လာကြသည်။ သူတို့၏ လှုပ်ရှားမှုများက ရူပဗေဒ နိယာမများကို ကျော်လွန်နေသည်။ တချို့က မြေပြင်ကနေ ခုန်တက်လာပြီး တချို့ကတော့ အပေါ်စီးကနေ တိုက်ရိုက် ခုန်ချလာကြသည်။
အပေါရီးယား၏ မျက်နှာဖုံးကို ဆောင်းထားသည့် ယူးဟွန်းက အနာဂတ်ကို သူ့မျက်လုံးများဖြင့် ဖတ်ရှုလိုက်သည်။
ဦးခေါင်းထဲမှာ ခေါင်းကိုက်ဝေဒနာ အနည်းငယ် ထိုးတက်လာပေမဲ့ သူတို့များကို ရှောင်တိမ်းဖို့ အကောင်းဆုံး လမ်းကြောင်းကို သူ ရှာတွေ့လိုက်သည်။
ဒါဟာ ကန်းဟယ်ရင် ၏ အနက်ရောင် လျှပ်စီးဓားများကို ဖောက်ထွက်ရတာထက် ပိုပြီး လွယ်ကူနေသည်။ ဒီအချက်တစ်ချက်တည်းကပင် ဒီအိုရာကာ၏ စွမ်းရည်ကို ယူးဟွန်းအတွက် ရှင်းရှင်းလင်းလင်း တိုင်းတာပြနေသည်။
"မင်းက အားနည်းတယ်။"
ကန်းဟယ်ရင် ထက် အားနည်းတယ်။ ချွဲဒိုယွန်း ထက်လည်း အားနည်းတယ်။
ဒီအိုရာကာကို ထူးချွန်သည့် အင်အားစုဝင်လို့ တင်စားကြပေမဲ့ နောက်ဆုံးတော့ ဒါဟာ သူတို့၏ နယ်မြေအတွင်းမှာပဲ သူတို့ဘာသာ ပေးထားသည့် ဘွဲ့နာမတစ်ခုမျှသာ ဖြစ်သည်။
အစစ်အမှန် စွမ်းအားဆိုတာ ဒီလို ဘွဲ့နာမများဖြင့် ချုပ်နှောင်ထားလို့ မရနိုင်။
"လိမ်ယှက်နေတဲ့ အနက်ရောင်ဓား။"
ကန်းဟယ်ရင် ၏ စာအုပ်ကို ဖတ်ရှုရာကနေ ယူးဟွန်း ရရှိလာသည့် စွမ်းရည်။
ယူးဟွန်းက လက်ကို ကျယ်ကျယ်ဖြန့်လိုက်ပြီး လျှပ်စီးတန်းများနှင့် ဖွဲ့စည်းထားသည့် ဓားကို ဆင့်ခေါ်လိုက်သည်။ မရေမတွက်နိုင်သည့် ဓားသွားများက ခရုပတ်ပုံစံ လိမ်ယှက်ပြီး ဒီအိုရာကာဆီကို ဝင်ရောက်တိုက်ခိုက်သွားသည်။
အန္တရာယ်ကို အာရုံခံမိသည့် ဒီအိုရာကာက သူ့နှုတ်ခမ်းကို ကိုက်လိုက်ပြီး တစ်စုံတစ်ခုကို အသက်သွင်းလိုက်သည်။
ဘုန်း! ဘုန်း! ဧရာမ ဒိုင်းကြီး နှစ်ခုက ကောင်းကင်ကနေ ပြုတ်ကျလာပြီး ယူးဟွန်း၏ လိမ်ယှက်နေသည့် အနက်ရောင်ဓားများကို ကာကွယ်လိုက်သည်။ ဒိုင်းများက တစ်စက္ကန့်ထက်ပိုပြီး မခံနိုင်ခဲ့ပေမဲ့ ဒီအိုရာကာအတွက်တော့ နောက်ဆုတ်ဖို့ အချိန်လုံလောက်သွားသည်။
သူ့တိုက်ခိုက်မှု၏ ရလဒ်ကို ကြည့်ရင်း ယူးဟွန်းက မျက်နှာဖုံးအောက်ကနေ မျက်လုံးများကို ကျဉ်းမြောင်းလိုက်သည်။
"မင်းက လက်ဗလာနဲ့ တိုက်နေသလို ဟန်ဆောင်ပြီး တကယ်တမ်းတော့ ပစ္စည်းမျိုးစုံကို အားကိုးနေတာပေါ့လေ။"
"ငါ့မှာ တခြားရွေးချယ်စရာ မရှိဘူးဆိုတာ ငါ သိတယ်။"
"သဘောပေါက်ပြီ။ မင်းရဲ့ တပည့်မလေးက မင်းဆီကနေ ဘာတွေ သင်ယူခဲ့လဲဆိုတာ ငါ ကောင်းကောင်း နားလည်သွားပြီ။"
ခွပ်! ပိုင်ရန်အကြောင်း ပြောလိုက်သည့်အခါ ဒီအိုရာကာ၏ နဖူးပေါ်မှာ သွေးကြောများ ထောင်လာသည်။
စက်ယန္တရား အစိတ်အပိုင်းများက ဒီအိုရာကာ၏ ပတ်လည်မှာ ပေါ်လာသည်။ လေယာဉ်ပျံကနေ ပံ့ပိုးပေးထားသည့် အလိုအလျောက် တိုက်ခိုက်နိုင်သည့် မှော်ပစ္စည်းများကို မြင်လိုက်ရသည့်အခါ ယူးဟွန်းက *ဘဲ့ရျွန်း* ကို ကိုင်ထားသည့် လက်ကို ပြန်ပြင်ဆင်လိုက်သည်။
ဒီပစ္စည်းများကို မှော်ပစ္စည်းများ ဖြစ်ရုံသက်သက်ဖြင့် အထင်သေးမိလျှင် မှားယွင်းသွားလိမ့်မည်။ တစ်ခုချင်းစီတိုင်းက သူ့အလျောက် အန္တရာယ်ရှိနေကြသည်။
ယူးဟွန်းက သူ့လက်ထဲက *ဘဲ့ရျွန်း* ကို ငုံ့ကြည့်လိုက်သည်။
အကယ်၍ ဒီလက်နက်ကို ဆာလီယိုအင်ပါယာကပဲ တကယ်တမ်း ထုဆစ်ခဲ့တာဆိုလျှင် သူတို့ဟာ ဒဏ္ဍာရီအဆင့်ရှိသည့် ပစ္စည်းများကိုတောင် အနည်းငယ် ဖန်တီးနိုင်စွမ်း ရှိသည်ဆိုတာပဲ။
ဒီအချက်ကို သဘောပေါက်သွားသည့်အခါ ယူးဟွန်းက ပြုံးစိစိ ဖြစ်သွားသည်။ သူ ဘာကိုများ စိုးရိမ်နေမိတာလဲ။ ရန်သူက ဘယ်လောက်ပဲ သန်မာပါစေ၊ သူတို့ ကိုင်ဆောင်ထားသည့် ကိရိယာများက ဘယ်လောက်ပဲ အန္တရာယ်များပါစေ၊ အရေးမကြီးတော့ပါ။
"အားလုံး အဆင်သင့် ဖြစ်ကြပြီလား။"
"ဘာ။"
"ငါ စောင့်ရတာ ပျင်းလာပြီ။ မင်းမှာ ရှိသမျှ အကုန်ထုတ်လိုက်စမ်းပါ။"
"မင်း အရူးထနေတာလား။ ရန်သူကို အခွင့်အရေးပေးနေတာလား။ ငါ အသက်တောင် မရှူနိုင်လောက်တဲ့အထိ မင်း အပြင်းအထန် ဖိအားပေးရမှာလေ!"
"အကယ်၍ ငါ မလုပ်ခဲ့ရင်ရော။"
"…မင်း ငါ့ကို အထင်သေးတဲ့အတွက် အကြီးအကျယ် ပေးဆပ်ရလိမ့်မယ်။ နောက်မှ နောင်တမရနဲ့။"
ယူးဟွန်း၏ လိမ်ယှက်နေသည့် အနက်ရောင်ဓားများကို တားဆီးခဲ့သည့် ဓားများနှင့် ဒိုင်းများက ဒီအိုရာကာ၏ ပတ်လည်မှာ ပြန်လည် လည်ပတ်လာပြန်သည်။ တိုက်ခိုက်မှုကို ခဏတာ ခုခံပေးခဲ့သည့် ဒိုင်းများကလည်း ဒီစနစ်၏ တစ်စိတ်တစ်ပိုင်း ဖြစ်သည်။
စက်ယန္တရား အစိတ်အပိုင်းများစွာဖြင့် ဝန်းရံခံထားရသည့် ဒီအိုရာကာက သူ့ဓားကို မြှောက်လိုက်ပြီး ယူးဟွန်းကို ချိန်ရွယ်လိုက်သည်။
ကောင်းကင်မှာတော့ ဆာလီယိုအင်ပါယာ၏ မှော်တပ်ဖွဲ့က ယူးဟွန်းကို အပေါ်စီးကနေ ငုံ့ကြည့်နေကြသည်။
နောက်ဆုံးတော့ တရားမျှတသည့် တစ်ဦးချင်း တိုက်ပွဲဆိုတာ မရှိနိုင်ပါ။ စစ်ပွဲမှာ ဘယ်သူကမှ ဂုဏ်သိက္ခာရှိသည့် တိုက်ပွဲကို မျှော်လင့်မနေကြပါ။
‘အနည်းဆုံးတော့ တခြားသူတွေကတော့ လောလောဆယ်မှာ တိုက်ပွဲဝင်နိုင်နေပုံပဲ။’
ဝီလ်ဖို့ဒ်နှင့် မဟာမိတ်အဖွဲ့၏ တခြားဘုရင်များက ဒြပ်စင်ကျောက်တုံးများကြောင့် ဖြစ်ပေါ်လာသည့် ကပ်ဘေးအလယ်မှာ ဆာလီယိုအင်ပါယာ၏ နောက်ဆုံး အင်အားစုဝင်ကို ခုခံထားနိုင်နေသည်။
ဒါပေမဲ့ အဲဒါလည်း အချိန်တစ်ခုအထိပဲ ခံပါလိမ့်မည်။ ဆာလီယိုအင်ပါယာက ဒီအတိုင်း ထိုင်ကြည့်နေမှာ မဟုတ်။ ထို့ပြင် လက်နက်ကွာဟချက်ကလည်း ကြီးမားသည်။ သူတို့က အခုလောလောဆယ်မှာ ရန်သူကို အလစ်အငိုက်မိအောင် လုပ်နိုင်ခဲ့ပေမဲ့ အခြေအနေက မကြာခင် ပြောင်းပြန် ဖြစ်သွားလိမ့်မည်။
ဒါကြောင့်ပဲ သူတို့က ရန်သူ့တပ်မှူး၏ ခေါင်းကို အရင်ဆုံး ဖြတ်ပစ်ဖို့ လိုအပ်နေတာ ဖြစ်သည်။
‘ဒီတိုက်ပွဲရဲ့ စီးဆင်းမှုကို ငါ ထိန်းချုပ်မယ်။’
ရန်သူကို အနိုင်ယူရုံဖြင့် မလုံလောက်ပါ။
သူတို့၏ စိတ်ဓာတ်များကို ချေမှုန်းပစ်နိုင်ဖို့အတွက် စွမ်းအားကွာဟချက်နှင့်တင် သူတို့ကို ဖိနှိပ်ပစ်ရလိမ့်မည်။ ဒါကြောင့်ပဲ ယူးဟွန်းက ဒီအိုရာကာ အပြည့်အဝ ပြင်ဆင်ပြီးသည်အထိ စောင့်ဆိုင်းနေခဲ့တာဖြစ်သည်။
မကြာခင်မှာပဲ ဒီအိုရာကာက လှုပ်ရှားလာသည်။ သူ့ပတ်လည်မှာ လည်ပတ်နေသည့် ဓားများနှင့် ဒိုင်းများက တစ်ပြိုင်နက်တည်း တုံ့ပြန်လာကြသည်။
စတင်ပြီ။
ယူးဟွန်းကို ချိန်ရွယ်ထားသည့် ဓားက ရုတ်တရက် အလယ်ကနေ နှစ်ခြမ်းကွဲသွားပြီး လေဆာရောင်ခြည်ကို ပစ်လွှတ်လိုက်သည်။
ဓားကိုယ်တိုင်က ဒီလိုမျိုး လေဆာများ ပစ်နိုင်လိမ့်မည်ဟု ဘယ်သူ ထင်မှာလဲ။ ယူးဟွန်းက လက်ပလက်စ်၏ မျက်လုံးဖြင့် ကြိုမြင်ထားပြီးသား ဖြစ်ပေမဲ့ လက်တွေ့မှာ မြင်လိုက်ရတာကတော့ လုံးဝကို တခြားစီပင်။
ရွေ့လျားမှု ပေါ့ပါးသွက်လက်စွာဖြင့် လေဆာရောင်ခြည်ကို ရှောင်တိမ်းရင်း ယူးဟွန်းက ဒီအိုရာကာဆီကို တိုးဝင်သွားသည်။
"သူ့ကို တားလိုက်!"
"သူ့ကို သတ်ပစ်ကြ!"
တစ်ပြိုင်နက်တည်းမှာပင် ဆာလီယိုအင်ပါယာ၏ မှော်တပ်ဖွဲ့က သူတို့၏ လှံများကို ယူးဟွန်းဆီ ချိန်ရွယ်ပြီး အရှိန်ပြင်းစွာ ထိုးဝင်လာကြသည်။
လေထဲမှာ ဖြတ်သန်းသွားသည့် မရေမတွက်နိုင်သည့် ဗုံးကြဲမှုများနှင့် ရန်သူ့တိုက်ခိုက်မှုများကြားမှာ ယူးဟွန်းက တစ်ယောက်တည်း ရပ်တည်ရင်း သူ၏ ခန္ဓာကိုယ်တစ်ခုတည်းဖြင့် သူတို့ကို ရင်ဆိုင်နေတော့သည်။