သတင်းစာရှင်းလင်းပွဲခန်းမအတွင်း ရှိလေထုမှာ တစ်ရှိန်ထိုး အေးစက်သွားခဲ့သည်။
ပါ့ချိုလ်အို ပြောလိုက်သည့် စကားကို လူတွေ နားမလည်နိုင် ဖြစ်ကုန်ကြသည်။
အားလုံး တိတ်ဆိတ်ငြိမ်သက်နေစဉ်မှာပင် ထိုမေးခွန်းကို မေးခဲ့သည့် သတင်းထောက်က တုန်တုန်ယင်ယင်ဖြင့် ပြန်ပြောလာသည်။
- ဗ... ဗျာ... ခင်ဗျား ခုနက ဘာပြောလိုက်တာလဲ...
[ ဆည်းဆာကန့်လန့်ကာ ကျူးလွန်ခဲ့တဲ့ ရက်စက်ကြမ်းကြုတ်တဲ့ ရာဇဝတ်မှုအတွက် စုဆောင်းသူများအသင်း က ပြင်းပြင်းထန်ထန် အရေးယူသွားမယ်လို့ ကျနော်တို့ ပြောခဲ့တာပါ။ ]
- အ... အဲဒါက...
ဖန်သားပြင်ပေါ်တွင် အစောပိုင်းက မေးခွန်းထုတ်ခဲ့သော သတင်းထောက်၏ မျက်နှာကို ပြသနေသည်။
သူ့မျက်နှာမှာ ဖြူဖပ်ဖြူရော် ဖြစ်နေပြီး ချွေးများ စို့နေလေသည်။
အခြေအနေက မည်သို့ ဦးတည်သွားနေသည်ကို သူက အလိုလို သိလိုက်ရသည်။
'ဟ... ဟေ့ကောင်တွေ အထဲမှာ ဘာတွေ လုပ်လိုက်ကြလို့လဲ။'
ဆည်းဆာကန့်လန့်ကာ က နောက်ကွယ်မှာ ဘာတွေ လုပ်ခဲ့တယ်ဆိုတာ သူ ဘယ်လိုလုပ် သိနိုင်မည်နည်း။
သူက ငွေကြေးယူထားရုံသာ ယူထားခဲ့ခြင်း ဖြစ်သည်။
ရှင်းလင်းပွဲအတွင်း အသင်းအဖွဲ့ကို အနေရခက်စေရန်နှင့် အများပြည်သူ၏ အမြင်တွင် အသင်းအဖွဲ့ဘက်သို့ ရွံ့ရှာမုန်းတီးလာစေရန်အတွက် စူးရှသော မေးခွန်းတစ်ခုကို မေးပေးရမည်ဟုသာ သူတို့ကို ဆိုထားခဲ့ခြင်း ဖြစ်သည်။
ပေးသည့် လုပ်အားခကလည်း ကောင်းပြီး အလုပ်ကလည်း ခက်ခဲလှသည်မဟုတ်သဖြင့် သူက လက်ခံခဲ့ခြင်းပင်တည်း။
'ငါတော့ ပြီးသွားပြီ။ ငါယူခဲ့တာ ငွေကြေးသက်သက် မဟုတ်ဘူး၊ အအန္တရာယ်ဆုံး ငွေကြေးကို ရယူမိလိုက်တာပဲ။'
ပါ့ချိုလ်အို၏ စကားကို သူ လက်မခံချင်တော့သော်လည်း မေးခွန်းကို မေးပြီးသွားခဲ့ပြီ ဖြစ်သည်။
သတင်းထောက်သည် သူ့ဦးနှောက်ကို တတ်နိုင်သမျှ အပြင်းအထန် ခြစ်ထုတ်ကာ စဉ်းစားနေရသည်။
ယခုအချိန်မှ 'အော် အဲ့ဒီလိုလား' ဟုဆိုကာ ဒီအတိုင်း ကျော်သွားရန်မှာမူ တုံးအလွတ်လွန်းနေပေလိမ့်မည်။
မည်သို့ပင်ဆိုစေ သူသည် ဤယုတ္တိမတန်သော ငြင်းခုံမှုကို မဖြစ်မနေ အနိုင်ယူရပေတော့မည်။
သူ ငွေတော့ ယူထားခဲ့မိပြီ၊ သို့သော် ၎င်းသည် သူ၏ ဂုဏ်သိက္ခာနှင့်လည်း သက်ဆိုင်နေပေသည်။
- အဲဒါကို ခင်ဗျားတို့ သေချာလို့လား။ အထဲမှာ ဖြစ်ပျက်ခဲ့တာတွေနဲ့ ပတ်သက်ပြီး...
[ ဘယ်သူမဆို အဲဒီလိုပဲ ထင်ကြမှာပါ။ ဒါပေမဲ့ ကျနော်တို့က အမှန်တရားကိုပဲ ပြောတာပါ။ ဒီအတွေးထဲကကမ္ဘာထဲမှာ ဆည်းဆာကန့်လန့်ကာ မျိုးနွယ်စုက စူးစမ်းလေ့လာရေးအဖွဲ့ကို စေလွှတ်ခဲ့တာ မဟုတ်ဘဲ သူလျှိုတွေကို စေလွှတ်ခဲ့တာပါ။ သူတို့က ဒီအတွေးထဲကကမ္ဘာကြီး ကျရှုံးသွားဖို့ မျှော်လင့်ခဲ့ကြပြီး အကယ်၍ အောင်မြင်ဖို့ ကြိုးစားလာခဲ့ရင်တောင် ဖျက်ဆီးပစ်ဖို့ ကြံရွယ်ခဲ့ကြတာပါ။ ]
- ဒ... ဒါက!
- ဘာလဲ။ အဲဒါ တကယ်ပဲလား။
တိတ်ဆိတ်နေသော အခန်းအတွင်း အမုန်းတရားနှင့် အံ့သြထိတ်လန့်မှုတို့ လွှမ်းခြုံသွားလေသည်။
လူတစ်ဦးမှ တစ်ဦးထံသို့ စိတ်ခံစားချက်များမှာ ကူးစက်ရောဂါတစ်ခုနှယ် လျင်မြန်စွာ ပျံ့နှံ့သွားသည်။
ဤမြင်ကွင်းကို ကြည့်နေသော ယူဟွန်းမှာ ပျော်ရွှင်မှုကို မထိန်းချုပ်နိုင်တော့ပေ။
'သူတို့ဘက်ကနေ ငါတို့ကို ဝင်စွက်ဖက်ဖို့ ကြိုးစားခဲ့ပေမဲ့ ငါတို့က အရင် လက်ဦးမှုရယူပြီး ပိတ်ဆို့လိုက်နိုင်တယ်။ သူတို့လည်း မနည်း ကြိုးစားထားကြတာပဲ။ ဘာပဲဖြစ်ဖြစ် နှစ်ဘက်စလုံးမှာ သက်သေအထောက်အထား မရှိဘူးလေ၊ ဒါကြောင့် ဘယ်သူက အရင်ပြောနိုင်လဲဆိုတာအပေါ်မူတည်ပြီး အသာစီးရသွားတာပဲ။'
အသင်းအဖွဲ့က တိတ်တဆိတ် ကန့်ကွက်ရန်နှင့် ၎င်းတို့ကို နှိမ့်ချရန် ကြိုးပားခဲ့ကြသော ဆည်းဆာကန့်လန့်ကာ အပေါ် ပြင်းထန်သော အမှတ်အသားတစ်ခု ချမှတ်လိုက်ခြင်း ဖြစ်ပေသည်။
၎င်းသည် ဆည်းဆာကန့်လန့်ကာ အတွက်သာ သက်ရောက်သည် မဟုတ်ပေ။
ထိုအမှတ်အသားသည် သားကောင်ဖြစ်ခဲ့ရသော အခြားမျိုးနွယ်စုများအတွက်လည်း အသင်းအဖွဲ့ဘက်မှ ပေးလိုက်သော သတိပေးချက်တစ်ခုပင် ဖြစ်သည်။
'တကယ်လို့ သူတို့သာ ငါတို့ရဲ့ စုဆောင်းသူတွေ ဒီနေရာမှာ ဘာကြောင့် သေဆုံးခဲ့ရတာလဲဆိုပြီး မေးရဲလာခဲ့ရင် ဆည်းဆာကန့်လန့်ကာ လိုမျိုး ဆက်ဆံခံရလိမ့်မယ်ပေါ့။'
သူတို့က ဆည်းဆာကန့်လန့်ကာ တို့၏ ရာဇဝတ်မှုမှာ သံသယရှိရုံမျှ မဟုတ်ဘဲ သေချာပေါက် ကျူးလွန်ခဲ့ကြောင်းကိုပါ ထုတ်ဖော်ပြောဆိုခဲ့ကြသည်။
အတူတကွ ဝေဖန်တိုက်ခိုက်ခဲ့ကြသူများမှာ အမှန်တကယ်တွင် လူသတ်သမားများ ဖြစ်နေကြောင်း ကြားလိုက်ရသည့်အခါ အခြားမျိုးနွယ်စုများ မည်သို့ ခံစားကြရမည်နည်း။
သူတို့သည် ယခုအချိန်အထိ တစ်ဦးနှင့်တစ်ဦး၏ ဆိုးညစ်သော လုပ်ရပ်များကို သိလျက်နှင့် လျစ်လျူရှုလာခဲ့ကြသော်လည်း ဤကဲ့သို့ နယ်ကျော်လာကြသည့် အခြေအနေမျိုးတွင်မူ ပါးစပ်ပိတ်ထားရန်သာ ရှိတော့သည်။
'သူတို့ သတိထားကြတော့မှာပါ။ ငါတို့ သူတို့ကို မသိဘူး။ ငါတို့နဲ့ ဘာမှ မဆိုင်ဘူး။ သူတို့ ဒီအတိုင်းပဲ ငြင်းကြလိမ့်မယ်။'
ဆည်းဆာကန့်လန့်ကာ က သတင်းထောက်အား ငွေကြေးကျွေးမွေးခဲ့ပြီး အခြားမျိုးနွယ်စုများနှင့်အတူ ပူးပေါင်းကန့်ကွက်ရန် တိုက်တွန်းခဲ့ခြင်း ဖြစ်သည်။
သို့သော် ဤဖြစ်ရပ်ကြောင့် အခြားမျိုးနွယ်စုများက သူတို့ကို ကျောခိုင်းသွားကြလိမ့်မည်။
ယူဟွန်း အသေအချာ သိနေသည်။
- ဘ... ဘယ်လိုလုပ်ပြီး အဲဒီလောက်အထိ အသေအချာ ပြောနိုင်ရတာလဲ။
သတင်းထောက်၏ အသံမှာ တုန်ရီနေသည်။
သူသည် မိမိ၏ ကျန်ရှိနေသေးသော သတိတရားကို အစွမ်းကုန် ဆုပ်ကိုင်ကာ ပါ့ချိုလ်အို၏ စကားများကို တစ်စစီ ဖြစ်အောင် မည်သို့ပင် ကြိုးစားချေပနေစေကာမူ...
[ ဟုတ်ပါတယ်၊ အထဲမှာ ဘာတွေ ဖြစ်ပျက်ခဲ့လဲဆိုတာကိုတော့ ကျနော်တို့ အသေအချာ မသိနိုင်ပါဘူး။ အတွေးထဲကကမ္ဘာထဲမှာ ကိရိယာတွေ အလုပ်မလုပ်တော့ အထောက်အထား ချန်ထားခဲ့ဖို့က ခက်ခဲပါတယ်။ ]
- ဒ... ဒါဆိုရင်...
[ ဒါပေမဲ့ အခြေအနေကို ဖမ်းဆုပ်နိုင်မယ့် အထောက်အထားတော့ ကျနော်တို့မှာ ရှိပါတယ်။ အဲဒါကတော့ ဆည်းဆာကန့်လန့်ကာ မျိုးနွယ်စုက စေလွှတ်လိုက်တဲ့ လူသုံးယောက်ရဲ့ စာရင်းပါပဲ။ သူတို့က အလယ်အလတ်အဆင့် စုဆောင်းသူတွေ ဖြစ်ပေမဲ့ သူတို့ရဲ့ အတိတ်က လုပ်ရပ်တွေကို စစ်ဆေးကြည့်တဲ့အခါ ထူးဆန်းလောက်အောင် ဖြူစင်နေတာကို တွေ့ရပါတယ်။ သူတို့ ဘာတွေ လုပ်ခဲ့တယ်၊ ဘယ်လိုလုပ်ခဲ့တယ်၊ ဘယ်လိုလုပ်ပြီး အလယ်အလတ်အဆင့်အထိ ရောက်လာခဲ့တယ်ဆိုတာကို ကျနော်တို့ လုံးဝ ရှာမတွေ့ခဲ့ပါဘူး။ အဲဒီလူ သုံးယောက်စလုံးပေါ့။ အဲဒါ အရမ်း ထူးဆန်းမနေဘူးလား။ ]
ဆည်းဆာကန့်လန့်ကာ က အတွေးထဲကကမ္ဘာအတွင်း စူးစမ်းလေ့လာမှုကို ဖျက်ဆီးပစ်ရန် စေလွှတ်လိုက်သော လုပ်ကြံသတ်ဖြတ်သူများ။
သူတို့၏ ဖြူစင်ဝေဝါးနေသော အတိတ်သည် ဤအခြေအနေတွင် အသင်းအဖွဲ့၏ ထုတ်ပြန်ချက်ကို ထောက်ခံအားဖြည့်ပေးသည့် ခိုင်လုံသော ရုပ်ပိုင်းဆိုင်ရာ အထောက်အထားတစ်ခု ဖြစ်လာခဲ့သည်။
- အဲဒါက အထဲမှာ အမှုအခင်းတစ်ခု ဖြစ်ပွားတာနဲ့ ဘယ်လိုလုပ်ပြီး သက်ဆိုင်သွားရတာလဲ...
[ ဘယ်လိုလုပ် မသက်ဆိုင်ရမှာလဲ။ ဒါဆို ကျနော် သတင်းထောက်ကို ပြန်မေးပါရစေ။ မျိုးနွယ်စုတစ်ခုတည်းကနေ အတိတ်မရှင်းတဲ့ လူသုံးယောက်ကို ဘယ်လိုလုပ်ပြီး အဲဒီလောက် အပြစ်အနာအဆာကင်းကင်းနဲ့ စေလွှတ်နိုင်ခဲ့မယ်လို့ ခင်ဗျား ထင်လဲ။ ]
မျက်စိတစ်မှိတ်အတွင်းမှာပင် သူက တရားခွင် ငြင်းခုံမှုတစ်ခုသယ်ယ် ပြန်လည် ချေပလိုက်သည်။
သတင်းထောက်မှာ ပါးစပ်အဟောင်းသား ဖြစ်သွားရသည်။ သူ့မျက်လုံးများမှာ တုန်ရီနေပြီး ငြိမ်ကျသွားလေသည်။
- အ... အဲဒါက... အဲဒါလေ...
[ ကျနော် ဒီမှာ ရှင်းရှင်းလင်းလင်း ပြောပါရစေ။ ဆည်းဆာကန့်လန့်ကာ က တတိယအကြိမ် စူးစမ်းလေ့လာမှုကို ဖျက်ဆီးပစ်ဖို့ ရည်ရွယ်ချက်ရှိရှိနဲ့ သူလျှိုတွေကို စိုက်ပျိုးထည့်သွင်းခဲ့တာ ဖြစ်ပြီး အဲဒီအကြောင်းရင်းကြောင့်ပဲ အသက်ရှင်နိုင်ခြေရှိတဲ့ အသက်ရှင်ကျန်ရီသူ အရေအတွက် လျော့နည်းသွားခဲ့ရတာပါ။ ကျနော် ဒီစကားကို ကျနော့်ရဲ့ ရာထူးတာဝန်နဲ့ တာဝန်ခံပြီး ပြောနေတာပါ။ ]
"ဟားဟားဟား!"
ယူဟွန်းမှာ ကျယ်လောင်စွာ မရယ်ဘဲ မနေနိုင်တော့ပေ။
ချွိုင်းဂျុងမိုးက သူ့ကို စောင့်မျှော်နေဖို့ ဘာကြောင့် ပြောခဲ့မှန်း သူ အခုမှ သဘောပေါက်သွားတော့သည်။ အကြောင်းမှာ ဤကိစ္စကြောင့်ပင်တည်း။
ထို့ထက်ပို၍ အရေးကြီးသည်မှာ တစ်ဖက်လူကို ဒေါသထွက်စေပြီး အပြစ်ဖို့မှုကို လွှဲပြောင်းပေးလိုက်သည့် ထိုထက်မြက်သော ဟောပြောချက်မှာ ယူဟွန်းက ပါ့ချိုလ်အိုထံသို့ ကြိုတင် အကြံပြုထားခဲ့သော ဇာတ်ညွှန်းများထဲမှ တစ်ခုပင် ဖြစ်ပေသည်။
ဆည်းဆာကန့်လန့်ကာ စေလွှတ်လိုက်သော လုပ်ကြံသတ်ဖြတ်သူများမှာ စူးစမ်းလေ့လာမှုကို ဖျက်ဆီးရန် ကြိုးပမ်းမှု မအောင်မြင်ဘဲ အားလုံး ဖယ်ရှားခံလိုက်ရချိန်တွင်...
ယူဟွန်းက ပါ့ချိုလ်အိုကို သီးသန့် သွားရောက် အကြံပေးခဲ့ဖူးသည်။
'အကယ်၍သာ ကျနော်တို့ အသက်ရှင်ပြီး ဒီကနေ ထွက်လာနိုင်ခဲ့မယ်ဆိုရင် သူတို့ကို ပြန်လက်စားချေမယ့် နည်းလမ်းတစ်ခု ကျနော့မှာ ရှိပါတယ်။'
'ဘာနည်းလမ်းလဲ။'
ထိုစဉ်က ပါ့ချိုလ်အို ပြောခဲ့သည်များကို ယူဟွန်း နားထောင်ခဲ့သော်လည်း ဤမျှလောက်အထိ အမြန်ဆုံး အကောင်အထည်ဖော်လိမ့်မည်ဟု သူ မထင်ထားခဲ့ပေ။
'ဟေး။ နောက်ကျရင်တော့ ငါ သူ့ကို သေချာပေါက် ပြန်ပေးဆပ်ရလိမ့်မယ်။'
ယူဟွန်းသည် သူ၏ ကိုယ်ပိုင် အကြံအစည်အတွက် အလွန်တရာ ကျေနပ်အားရနေမိသည်။
အထူးသဖြင့် သူသည် ဆည်းဆာကန့်လန့်ကာကို အများပြည်သူ၏ နံပါတ်တစ် ရန်သူတော်အဖြစ်သို့ အလုံးစုံ ပြောင်းလဲပစ်လိုက်နိုင်ခဲ့ပြီ ဖြစ်သည်။
- ဘာလဲ။ အဲဒီလူသုံးယောက်ကြောင့် ထိခိုက်သေဆုံးသူ ပိုများသွားခဲ့ရတယ်လို့ ဆိုလိုတာလား။
- ဒါဆိုရင်... အသက်ရှင်နိုင်ခြေရှိတဲ့သူတွေ အများကြီး ပိုရှိခဲ့ဦးမှာပေါ့လို့ ပြောချင်တာလား။
သတင်းစာရှင်းလင်းပွဲသို့ တက်ရောက်လာကြသော လူများ၏ စူးရှသော မျက်ဝန်းများသည် ဆည်းဆာကန့်လန့်ကာထံမှ ငွေကြေးရယူထားခဲ့သော သတင်းထောက်ဆီသို့ တစ်ရှိန်ထိုး စိုက်ကြည့်လာကြသည်။
ယူဟွန်းသည် အမှန်တရားကို လိမ္မာပါးနပ်စွာဖြင့် လိမ်ညာလှည့်ဖြားပစ်ခဲ့ပြီ ဖြစ်သည်။
အမှန်တကယ်တွင်မူ လုပ်ကြံသတ်ဖြတ်သူ သုံးဦးမှာ ၎င်းတို့၏ တာဝန်ကို မထမြောက်ခဲ့ပေ။
ဘာမှပင် မလုပ်ရသေးဘဲ သေဆုံးသွားခဲ့ကြခြင်း ဖြစ်သည်။
သူတို့သည် မည်သူ့ကိုမျှ သတ်ဖြတ်ခဲ့ခြင်း မရှိပေ။
အရာရာတိုင်းသည် အစပျိုးရုံမျှသာ ရှိသေးသည်။
သို့သော်၊ အဲဒါက ဘာဖြစ်သွားလဲ။
'အရေးကြီးတာက သူတို့ဟာ တကယ်ကို ဆိုးသွမ်းတဲ့ လူတွေ ဖြစ်နေတယ်ဆိုတာပါပဲ။'
ထို့ကြောင့် သူက အမှန်တရားကို မည်သို့ လိမ္မာပါးနပ်စွာ လိမ်ညာဝေဖန်တိမ်းစောင်းရမည်ကို သင်ကြားပေးခဲ့ခြင်း ဖြစ်သည်။ ထိုလူသုံးယောက်ကြောင့် သားကောင်ဖြစ်ရသူ ပိုလာခဲ့ရသည်။
အသက်ရှင်ကျန်ရစ်သူ ပိုများလာနိုင်ခြေ ရှိခဲ့သည်။
ဤကဲ့သို့သော ပုံစံမျိုးဖြင့်ပင်။
'ဒါကတော့ လိမ်ညာတာ မဟုတ်ဘူး မဟုတ်လား။ တကယ်လို့သာ အဲဒီလူသုံးယောက်က မိုဘီဒစ်နဲ့ တိုက်ခိုက်တုန်းက ကူညီခဲ့မယ်ဆိုရင် လူတစ်ယောက်လောက်က ပိုပြီး အသက်ရှင်လာနိုင်ချေ ရှိတာပဲလေ။'
၎င်းသည် 'အကယ်၍သာ' ဆိုသော အခြေအနေမျှသာ ဖြစ်သော်လည်း အမှန်တရားကို မသိကြသော အခြားသူများ၏ အမြင်တွင်မူ လုံးဝ လွဲမှားစွာ မြင်ယောင်သွားစေခဲ့သည်။
ဆည်းဆာကန့်လန့်ကာသည် အတွေးထဲကကမ္ဘာအတွင်းသို့ သူလျှိုများကို စိုက်ပျိုးထည့်သွင်းကာ စူးစမ်းလေ့လာမှုကို ဖျက်ဆီးရန် ကြိုးပမ်းခဲ့ကြသည်။
ယခုအချိန်အထိ အသင်းအဖွဲ့၏ ပေါ့ဆသော သဘောထားကို ရန်လိုခဲ့ကြသော မျိုးနွယ်စုများမှာလည်း ဤအချိန်မှစ၍ ဆည်းဆာကန့်လန့်ကာဘက်သို့ ကျောခိုင်းသွားကြတော့သည်။
"ဒီလိုလုပ်လိုက်တာ မင်း လက်ချက်လား။"
ကွမ်ဂျီအာ က ဤနည်းလမ်းသည် တစ်နေရာရာတွင် ရင်းနှီးနေသည်ကို ချက်ချင်း သတိထားမိလိုက်ပြီး ယူဟွန်းကို မေးမြန်းလိုက်သည်။
"ဘယ်သူသိမှာလဲ။ ကျနော် မသိပါဘူး။"
"ဟမ့်။ မင်း နောက်မှာ ကျန်ခဲ့တုန်းက ဘာတွေ ပြောမလဲလို့ ငါ စဉ်းစားနေခဲ့တာ၊ အဲဒါက ဒီကိစ္စကိုး။ မင်းကတော့ စိတ်ဝင်စားစရာကောင်းတဲ့ အလုပ်တစ်ခု လုပ်လိုက်တာပဲ။"
"ကျနော်ကတော့ လူတစ်ယောက်ကို ပြန်လက်စားမချဘဲ မနေနိုင်တဲ့ အမျိုးအစားထဲ ပါတာကိုး။"
"အင်း? ဘာတွေ ဖြစ်နေတာလဲ။"
ကန်းဟယ်ရင် သည် ကန်းယူဟွန်း၏ ပေါင်ပေါ်တွင် လဲလျောင်းနေနေရာမှ မျက်လုံးများကို ဖွင့်လိုက်သည်။
သူမသည် ခေါင်းကို မော့လိုက်ပြီး အနီးနားတွင် ရှိနေသော ယူဟွန်းကို မြင်လိုက်ရသောအခါ ထိုင်ခုံပေါ်မှ လန့်ဖြန့်ပြီး ထခုန်လိုက်သည်။
"ဟွန့်၊ အွန်း..."
ခဏကအထိ ယူဟွန်း၏ ပေါင်ပေါ်တွင် ခေါင်းတင်ကာ အိပ်ပျော်နေခဲ့မိကြောင်း သူမ သတိထားမိသွားလေသည်။
ကန်းဟယ်ရင် ၏ ဖြူစင်သော အသားအရေမှာ နီရဲသွားတော့သည်။
"တ... တောင်းပန်ပါတယ်၊ ကျမ၊ အဲဒါ၊ အဲဒါကလေ..."
"ဟယ်ရင်။ မင်း ပင်ပန်းနေလို့ပါ၊ ရှက်မနေစမ်းပါနဲ့ကွာ။"
"…ဟုတ်ကဲ့။"
ကန်းဟယ်ရင် မှာ အသိစိတ် လုံးဝ ပြန်ဝင်လာခဲ့ပြီ ဖြစ်သည်။
သူမသည် ပူထူနေသော မျက်နှာကို လက်ဖြင့် ဆက်လက် အအေးခံရင်း ယူဟွန်းကို ခိုးကြောင်ခိုးဝှက် ကြည့်လိုက်သည်။
'င... ကျမက ယူဟွန်းရဲ့ ပေါင်ပေါ်မှာ ခေါင်းတင်ပြီး အိပ်မိခဲ့တာပေါ့...'
သူမသည် တံတွေးကို မသိမသာ မျိုချလိုက်မိသည်။ ယခုလို ရှက်စရာကောင်းသော အလုပ်ကို လုပ်မိသည့်အတွက် သူ့ကိုယ်သူ ဆူပူကြိမ်းမောင်းနေမိသည်။ သို့သော်လည်း စိတ်မကောင်းဖြစ်မိခြင်းကို မတားဆီးနိုင်ဘဲ ယူဟွန်းထံသို့သာ အကြည့်တို့ ရောက်သွားနေမိသည်။
ယူဟွန်းကမူ ကန်းဟယ်ရင် ၏ တစ်ကိုယ်တော် ပြဇာတ်ကို လျစ်လျူရှုလိုက်ပြီး သတင်းစာရှင်းလင်းပွဲဆီသို့သာ အာရုံစိုက်ထားလိုက်သည်။
'ပြီးသွားပြီ။ အကွက်ကျကျ မိသွားပြီပဲ။'
အသင်းအဖွဲ့က ထိုကဲ့သို့သော ထုတ်ပြန်ချက်ကို ထုတ်ပြန်ရန် သတင်းစာရှင်းလင်းပွဲကို အသုံးပြုခဲ့ခြင်းမှာ ကြီးမားသော ကိစ္စရပ်တစ်ခုပင် ဖြစ်ပေသည်။
ထို့ထက်ပို၍ အရေးကြီးသည်မှာ ပုံရိပ်ပိုင်းဆိုင်ရာ ကွာခြားချက်ကြီး ရှိနှင့်နေပြီ ဖြစ်သည်။
ဆည်းဆာကန့်လန့်ကာ သည် လုပ်ငန်းခွင်အတွင်း အမြဲတမ်း အငြင်းပွားဖွယ်ရာများ ရှိနေသည့် နေရာတစ်ခု ဖြစ်ခဲ့ပြီး၊ ၎င်းတို့သည် အမှန်တကယ်တွင် ပွဲစားလုပ်ငန်းများကို တိတ်တဆိတ် လက်ဝါးကြီးအုပ်ကာ အများပြည်သူရှေ့တွင် ၎င်းတို့၏ ပုံရိပ်ကို ဖျက်ဆီးခဲ့ကြခြင်း ဖြစ်သည်။
ပါ့ချိုလ်အိုသည် မိမိ၏မျိုးနွယ်စုအတွက် ကြီးမားသော ကျေးဇူးဆပ်မှုကို ပြုလုပ်ခဲ့ခြင်း ဖြစ်သည်။
၎င်းသည် မိမိကိုယ်မိမိ ပြန်လည် ပစ်ခတ်မိခြင်း ခံလိုက်ရသည့် အကောင်းဆုံးသော ဥပမာတစ်ခုပင် ဖြစ်ပေသည်။
- ဟင့်၊ ဟင့်...
သတင်းထောက်မှာ ဘာမှ ထပ်မပြောနိုင်တော့ဘဲ ထိုင်ခုံပေါ်တွင် ပုံကျသွားလေသည်။
သူ့မှာ အရာရာတိုင်းကို လက်မြှောက်အရှုံးပေးလိုက်ရသဖြင့် သနားစရာကောင်းနေသော်လည်း မည်သူကမျှ သူ့ကို သနားကြင်နာခြင်း မရှိကြပေ။
သူသည် ငွေကြေးအတွက် လူတစ်ဦးတစ်ယောက်ကို အသရေဖျက်ရန် ဆောင်းပါးများ ရေးသားခဲ့သူ သို့မဟုတ် မမှန်မကန် သတင်းအချက်အလက်များကို ဖြန့်ဝေခဲ့သူ ဖြစ်ပေသည်။
သူသည် မိမိ၏ လုပ်ရပ်အတွက် ပြန်လည် ပေးဆပ်ရမည်သာ ဖြစ်သည်။
ထို့အပြင် သူသည် အခြားသော သတင်းထောက်များအတွက် စံနမူနာကောင်းတစ်ခု ဖြစ်လာရပေမည်။
ဖောင်တိန်ကို အသုံးပြု၍ လူတစ်ဦးတစ်ယောက်ကို ထိခိုက်နာကျင်စေရန် ကြိုးပမ်းသူများသည် ထိုထက်ပို၍ ပေးဆပ်ရမည် ဖြစ်သည်။
ယူဟွန်းသည် သူ၏ တက်ဘလက်ကို တစ်ချက် ငဲ့ကြည့်လိုက်သည်။
သတင်းစာရှင်းလင်းပွဲတွင် ဖြစ်ပွားခဲ့သော မျိုးနွယ်စုတစ်ခုအပေါ် ဝေဖန်မှုမှာ ပါးစပ်ပြောစကားများဖြင့်ပင် အလွန်တရာ လျင်မြန်စွာ ပျံ့နှံ့နေပြီ ဖြစ်သည်။
၎င်းတို့အနက် အများစုမှာ အသင်းအဖွဲ့၏ စကားများကို ယုံကြည်ကြပြီး ဆည်းဆာကန့်လန့်ကာ ကို ရှုတ်ချသည့် ဆောင်းပါးများကို ရေးသားခဲ့ကြသည်။
နိုင်ငံတွင်း၌ အမြစ်တွယ်ကာ နေရာယူထားခဲ့သော ထိုဧရာမ အဖွဲ့အစည်းကြီးမှာ
ဖြည်းဖြည်းချင်း စားသုံးခံရကာ ပြိုလဲကျတော့မည် ဖြစ်သည်။
***
မကြာမီမှာပင် သတင်းစာရှင်းလင်းပွဲ ပြီးဆုံးသွားခဲ့သည်။
"ဪ၊ ဂျီအာ။ မင်းမှာ နာမည်ပြောင် အသစ်တစ်ခု ရနေပြီပဲ။"
ယူဟွန်းက အစောတည်းက ကောလာဟလအဖြစ် ပျံ့နှံ့နေပြီဖြစ်သော ကွမ်ဂျီအာ ၏ နာမည်ပြောင်ကို အံ့သြချီးကျူးလိုက်သည်။
"နာမည်ပြောင် ဟုတ်လား။ ဘာတဲ့လဲ။"
"သူတို့က မင်းကို 'အရူးဝံပုလွေ' လို့ ခေါ်ကြတယ်။ မိုဘီဒစ်နဲ့ တိုက်ခိုက်တုန်းက မင်းရဲ့ ပုံစံက သူတို့အပေါ် အတော်လေး အထင်ကြီးစရာ အမှတ်တရ ဖြစ်သွားစေခဲ့ပုံပဲ။"
'အရူးဝံပုလွေ' ဆိုသော နာမည်သည် ကွမ်ဂျီအာ နှင့် အလွန်တရာ လိုက်ဖက်သည်ဟု ယူဟွန်းက တွေးလိုက်မိသည်။
သူမသည် သွေးများ စီးကျနေလျှင်တောင်မှ သွားများကို ကျိတ်ကာ ဝံပုလွေ၏ ပါးစပ်ထဲသို့ သူမ၏ ပါးစပ်ကို ထိုးထည့်ကာ မိုဘီဒစ်ကို အပိုင်းပိုင်း ဆုတ်ဖြဲပစ်ခဲ့သည်။
သူမ၏ ပုံစံသည် အမှန်တကယ်ပင် ရူးသွပ်နေသော ဝံပုလွေတစ်ကောင်နှင့် အလွန်တူနေပေသည်။
"ခင်ဗျားတို့ နှစ်ယောက်စလုံး အဆင့်တွေ တက်လာကြပြီး ကျနတို့ရဲ့ အဖြူရောင်ပန်းပွင့် စီမံခန့်ခွဲမှုအဖွဲ့ရဲ့ တန်ဖိုးကို ပိုပြီး မြင့်မားလာစေခဲ့တယ်။ ကံဆိုးတာကတော့ လူတွေရဲ့ အာရုံစိုက်မှုတွေက ဆည်းဆာကန့်လန့်ကာ ဘက်ကို ရောက်နေကြပုံပဲ။"
ဒါကလည်း ရှောင်လွှဲ၍ မရနိုင်ပါပေ၊ အကြောင်းမှာ ဆည်းဆာကန့်လန့်ကာ လုပ်ဆောင်ခဲ့သည်မှာ အလွန်တရာ ကြီးမားသော ဖြစ်ရပ်တစ်ခု ဖြစ်နေသောကြောင့်တည်း။
ဆန့်ကျင်ဘက်အနေဖြင့် ယူဟွန်းနှင့် သူ့အဖွဲ့ လုပ်ဆောင်ခဲ့သည်များမှာ အနည်းငယ် အရိပ်မိုးခံလိုက်ရသော်လည်း ၎င်းတို့ ရရှိခဲ့သည့် အကျိုးသက်ရောက်မှုများကမူ ရှိနေဆဲပင် ဖြစ်သည်။
"အခုတော့ ဂျီအာလည်း နိုင်ငံတော်က အသိအမှတ်ပြုထားတဲ့ လေးစားလောက်စရာ အလယ်အလတ်အဆင့် စုဆောင်းသူ တစ်ယောက် ဖြစ်သွားပြီပဲ။ ဒီအချိန်အထိတော့ မင်းကို ရင့်ကျက်မှု မရှိသေးဘူးလို့ ပြောနေကြတဲ့သူတွေ ရှိခဲ့တယ်။ ဒါပေမဲ့ ဒီအချိန်ကစပြီး ဘယ်သူမှ မငြင်းတော့ဘူး။"
"ဟမ့်။ သဘာဝကျတဲ့ ရလဒ်တစ်ခုပါပဲကွာ။"
ကွမ်ဂျီအာ က နှာခေါင်းရှုံ့လိုက်သော်လည်း သေချာစိုက်ကြည့်မည်ဆိုပါက သူမ၏ နားရွက်လေးများ အနည်းငယ် နီရဲနေသည်ကို တွေ့ရပေမည်။
"ယူဟွန်း၊ ကျမရော ဘယ်လိုလဲ။"
"ဟယ်ရင်၊ မင်းမှာ 'မည်းနက်သောဓား' ဆိုတဲ့ နာမည်ပြောင် ရှိပြီးသား မဟုတ်ဘူးလား။"
"အာ။"
"နာမည်ပြောင်က အဓိက မဟုတ်ပါဘူး။ ခင်ဗျားတို့ နှစ်ယောက်စလုံး ဒီအတွေးထဲကကမ္ဘာကို ရှင်းလင်းနိုင်ခဲ့လို့ ဆုလာဘ်အနေနဲ့ စာရင်းအင်းတွေ အများကြီး မြင့်တက်လာပြီး ကျွမ်းကျင်မှုအသစ်တစ်ခု ရလာခဲ့ကြတယ် မဟုတ်လား။"
သူတို့နှစ်ဦးစလုံး ခေါင်းညိတ်ပြလိုက်ကြသည်။ သူတို့သည် ပို၍ပင် သန်မာလာခဲ့ပြီ ဖြစ်ကြောင်းကို ကိုယ်တိုင် ခံစားမိပြီးသား ဖြစ်ကြသည်။
ဇာတ်လမ်းသုံးခု ရောနှောနေသည့် ပေါင်းစပ်အမျိုးအစား အတွေးထဲကကမ္ဘာ။
အခက်အခဲက ငရဲလို ဆိုးရွားသော်လည်း ၎င်းကို ရှင်းလင်းနိုင်ခြင်းအတွက် ဆုလာဘ်မှာလည်း သူတို့ တစ်ခါမှ မကြုံဖူးခဲ့ဖူးသလောက် အလွန်တရာ ပုံအောပေးထားခဲ့သည်။
ယူဟွန်းက ကျေနပ်အားရစွာဖြင့် ခေါင်းညိတ်လိုက်သည်။
"အခုတော့ လူတိုင်းက မှန်ကန်တဲ့ လမ်းကြောင်းပေါ် ရောက်နေကြပြီဆိုတော့ နောက်ထပ် လုပ်စရာရှိတာကို စတင်ရတော့မယ် ထင်တယ်။"
"နောက်ထပ် လုပ်စရာ ဟုတ်လား။"
"ဘာလဲဟင်။"
တိတ်တဆိတ် နားထောင်နေခဲ့သော ဘက်ဆော့ယွန်းကလည်း စပ်စုလိုစိတ်ဖြင့် မေးမြန်းလိုက်သည်။
"အခု ဘာတွေ လုပ်ဖို့ စဉ်းစားနေပြန်ပြီလဲ။"
"ဘာမှ မဟုတ်ပါဘူး။ တတိယလူကို သွားရှာရမယ်လေ။"
***
"ဦးလေး။ အရမ်း တော်တာပဲဗျ။"
"ဩော်၊ ဆောင်းအာ လား။"
သတင်းစာရှင်းလင်းပွဲကို အဆုံးသတ်ခဲ့သော ပါ့ချိုလ်အိုသည် စောင့်ဆိုင်းခန်းသို့ ပြန်လာခဲ့ပြီး အနည်းငယ် ထိန်းချုပ်ထားခဲ့ရသော အသက်ရှူသံကို ထုတ်လွှတ်လိုက်သည်။ သူသည် အချိန်နှောင်းမှ ထွက်ပေါ်လာသော ချွေးများကို သုတ်လိုက်ပြီး ထိုင်ချလိုက်သည်။
စောစောစီးစီး ရောက်လာကာ သူ့ကို စောင့်ဆိုင်းနေခဲ့သော ယူဆောင်းအာက ရယ်မောရင်း ပစ်လဲသွားမတတ် ဖြစ်နေသည်။
"ဝါး၊ ဦးလေး။ တကယ် ပြောတာ အရမ်းကောင်းတာပဲ။ ဦးလေးမှာ အဲဒီလို စကားပြောစွမ်းရည်မျိုး ရှိမှန်း ကျမ မသိခဲ့ဘူး။ ဒီနေ့မှပဲ ကျမ ပထမဆုံး သိရတာ။"
"ငါ လုပ်သင့်တာကို လုပ်ခဲ့တာပါ။"
"ဒါနဲ့လေ၊ အဲဒါ ဘယ်သူ ပြောပြတာလဲဟင်။ ဟင်?"
"ဘာကို ပြောတာလဲ။"
"သတင်းစာရှင်းလင်းပွဲမှာ ပြောခဲ့တဲ့ စကားလေ။ အဲဒါက ဦးလေးရဲ့ ပုံစံလည်း မဟုတ်ဘူး၊ ပြီးတော့ ကျမတို့ အသင်းအဖွဲ့က ဦးလေးကို သင်ပေးထားတာလည်း မဟုတ်ဘူး။ ဟုတ်တယ်မလား။"
ပါ့ချိုလ်အိုက သူမကို လှည့်စား၍ မရနိုင်တော့သည့် ပုံစံဖြင့် ခေါင်းညိတ်ပြလိုက်သည်။
"ငါ အကူအညီ နည်းနည်း ရခဲ့တယ်။ ဒါက ထိရောက်မှု ရှိနိုင်တယ်လို့ သူက အကြံပေးခဲ့တာ။"
"အကူအညီ ဟုတ်လား။ ဘယ်သူ့ဆီကလဲ။"
"ကန်းယူဟွန်း ဆီကပေါ့။"
"ဟင်?"
ယူဆောင်းအာ၏ မျက်လုံးများ အပြူးသား ဖြစ်သွားသည်။
"ကန်းယူဟွန်း၊ ပြောပြသူလေ။ သူက ဦးလေးကို အဲလို ပြောပြတာပေါ့။ ဒါက ထိရောက်မှု ရှိလိမ့်မယ်လို့ သူ ပြောတာပေါ့။"
"အင်း။ အဲဒီကောင်လေးလေ။"
ယူဆောင်းအာသည် ကန်းယူဟွန်း ၏ ပုံစံကို ပြန်ပြောင်း စဉ်းစားရင်း ပါးစပ်ကို ပိတ်လိုက်သည်။
ယူဟွန်း ဤကိစ္စတွင် ပါဝင်ပတ်သက်နေသည်ဟု တွေးလိုက်မိသောအခါ သူမအနေဖြင့် တစ်စုံတစ်ရာ ယုတ္တိရှိသည်ဟု ခံစားလိုက်ရသည်။
"ဟေး၊ ဦးလေး။ ဦးလေး သူ့ကို လူကိုယ်တိုင် တွေ့ခဲ့ရပြီး အတူတူ လှုပ်ရှားခဲ့ရတာပဲ။ သူ ဘယ်လိုနေလဲ။"
"အံ့သြစရာ ကောင်းလောက်အောင် တော်တဲ့ကောင်။"
ပါ့ချိုလ်အိုက မည်သို့မျှ နှောင့်နှေးတွန့်ဆုတ်နေခြင်း မရှိဘဲ ဖြေကြားလိုက်သည်။
"အစတုန်းကတော့ သူက ပြောပြသူ တစ်ယောက်ဖြစ်နေလို့ ငါ သူ့ကို အထင်မကြီးခဲ့ပါဘူး။ တိုက်ခိုက်ရေးသမား ပြောပြသူ ဖြစ်နေရင်တောင်မှ စုဆောင်းသူတွေရဲ့ ကျောပိုးပြီး လိုက်လာမယ့်သူလို့ပဲ ငါ ထင်ခဲ့တာ။ ဒါပေမဲ့ အတွေးထဲမှာ သူ လုပ်ပြခဲ့တာတွေကို မြင်လိုက်ရတဲ့အခါ ငါ မှားသွားမှန်း သဘောပေါက်သွားတယ်။ သူက ရိုးရိုးရှင်းရှင်း ပြောပြသူ တစ်ယောက် မဟုတ်ဘူး။ တခြား ပြောပြသူတွေနဲ့ မတူဘူး။"
ပါ့ချိုလ်အိုသည် အသက်ကို ပဓာနမထားဘဲ မိုဘီဒစ်နှင့် တိုက်ခိုက်နေခဲ့သော ယူဟွန်း၏ ပုံရိပ်ကို ယခုတိုင် မမေ့နိုင်သေးပေ။
လူတိုင်း လက်မြှောက်အရှုံးပေးလိုက်ကြချိန်တွင် သူသည် အဆုံးအထိ မိမိ၏ စိတ်ဓာတ်ကို လက်မလွှတ်ခဲ့ပေ။
သူသည် ယခုအခါ အေးစက်စက် အေးခဲစပြုလာပြီဖြစ်သော မိမိ၏ ရင်ထဲတွင် ပူလောင်သော မီးလျှံတစ်ခုကို ပြန်လည် ထိုးဆွပေးလိုက်လေသည်။
သာ၍သာ ယူဟွန်းသာ မရှိခဲ့ပါက သူသည် ဤနေရာတွင် ဤကဲ့သို့ ချောချောမွေ့မွေ့ စကားပြောဆိုနိုင်လိမ့်မည် မဟုတ်ပေ။
"ဦးလေး တစ်ယောက် သူတစ်ပါးကို ဒီလောက်အထိ ပွင့်ပွင့်လင်းလင်း ချီးကျူးတာ ဒါ ပထမဆုံး ကြားဖူးတာပဲ။"
"ဘာတွေ လျှောက်ပြောနေတာလဲ။"
"ဦးလေးက အမြဲတမ်း အဲဒီလိုပဲလေ။ ကျမ အစတုန်းက လူသစ်ဘဝနဲ့ ရောက်လာပြီး သင်ယူရတုန်းကတောင် ဦးလေး ချီးကျူးစကား တစ်ခွန်းမှ မပြောခဲ့ဖူးဘူး။ အများကြီး ပြောင်းလဲသွားပြီပဲ၊ အများကြီး ပြောင်းလဲသွားပြီ။ အသက်ကြီးလာလို့လား။"
"အဲဒါလည်း ဖြစ်နိုင်တာပဲ။"
"စိတ်ဝင်စားစရာပဲနော်။ ဦးလေးက သူ့အကြောင်းကို အဲဒီလောက်အထိ ပြောနေတာကိုး။"
ယူဆောင်းအာသည် ကန်းယူဟွန်း ကို ပြန်ပြောင်း စဉ်းစားလိုက်သည်။ သူမ၏ [ပင်ကိုစွမ်းရည်] ကို ဖတ်ရှုနိုင်ခဲ့ပြီး သူမကို ချောမောကြောင်း ရိုးသားစွာ ချီးကျူးပေးခဲ့သော လူသား။
ဖက်ခနဲ။
ထိုစဉ်က ဖြစ်ပျက်ခဲ့သည်များကို ပြန်ပြောင်း သတိရလိုက်မိသဖြင့် ယူဆောင်းအာသည် မသိလိုက်ဘဲ ပါးပြင်များ နီရဲသွားခဲ့သည်။
ထိုစဉ်က သူမတွင် မိတ်ကပ်မပါသော မျက်နှာဗလာ ဖြစ်နေခဲ့သည်ကို သူမ သတိရသွားလေသည်။