အခန်း ၂၀၀။ ။ <အပြန်အလှန်ပေးဆပ်ခြင်း>
ရုံးအပြင်ဘက်တွင် ချိုဂီချူလ်သည် ဆေးလိပ်ကို ဖွာရှိုက်လိုက်သည်။ မီးခိုးငွေ့တို့က သူ့ကို ဝန်းရံထား၏။ သူ စိတ်တည်ငြိမ်အောင် ကြိုးစားနေသော်လည်း သူ့လက်များမှာ တုန်ရီနေဆဲပင်။
“ပြတ်တာပဲ… ပြတ်တာပဲကွာ! ငါ အစောကြီးကတည်းက ရောင်းလိုက်ရမှာ။ ၅၀၀၀ ဒေါ်လာတန်တုန်းက ရောင်းလိုက်ရင်တောင်… ငါ့မှာ လုံခြုံနေဦးမှာ။”
သူ နောက်ကျမှ နောင်တရနေမိသော်လည်း အချိန်ကား နောက်ကျလွန်းနေပြီ။ ချိုဂီချူလ်သည် သူ့ဖုန်းကို ထုတ်ကာ Bit Trading အကောင့်ထဲသို့ လော့ဂ်အင်ဝင်လိုက်သည်။
1BTC 31.60။
1BTC 30.40။
1BTC 29.90။
ဈေးနှုန်းမှာ ဆက်လက်ကျဆင်းနေဆဲဖြစ်သည်။ ကန်ဝူဆောင်း၏ မကြာသေးမီက ထုတ်ပြန်ချက်ကြောင့်ဟု လူအများက ယုံကြည်နေကြသည်။ သို့သော် ချိုဂီချူလ်မှာမူ နားမလည်နိုင်ပေ။
“ဘာလို့များ လူတွေက အဲ့ဒီကောင်ကို အဲ့လောက်ထိ အထင်ကြီးနေကြတာလဲ။ ဘာလို့များ လူတိုင်းက သူ့စကားကို နားထောင်နေကြတာလဲ။”
သူ အဖြေရှာရန် ကြိုးစားသော်လည်း အဖြေကား မရှိချေ။ ဒေါသတို့မှာ ပို၍ပို၍ ထွက်လာသည်။ သူ ဆေးလိပ်တိုကို မြေပြင်ပေါ်သို့ ပစ်ချလိုက်သည်။
“ဒီနေ့မကုန်ခင် ငါ ပြန်ဆယ်ယူမယ်။ အခွင့်အရေး ရှိပါသေးတယ်။ ဈေးက မြန်မြန်ကျသလိုပဲ မြန်မြန်လည်း ပြန်တက်လာနိုင်တာပဲ။”
***
မိန့်ခွန်းပြောပြီးနောက် ဝူဆောင်းသည် ဟိုတယ်အခန်းသို့ ပြန်လာကာ လက်တော့ပ်ကို ဖွင့်လိုက်သည်။
“တစ်ဒေါ်လာအထိ ဆွဲချမယ့်အချိန်ပဲ။ နောက်ထပ် ဘယ်တော့မှ ပြန်မတက်နိုင်အောင် ငါသေချာလုပ်ပေးမယ်။”
ဝူဆောင်းသည် သူ၏ အိမ်သုံးကွန်ပျူတာကို အဝေးမှ ထိန်းချုပ်ကာ ပရိုဂရမ်၏ ကန့်သတ်ချက်များကို ပြင်ဆင်လိုက်သည်။ သူသည် ဂဏန်းများကို ၉၀ နှင့် ၇၀ ဆင့်ဟု သတ်မှတ်လိုက်၏။ စနစ်က ကမ္ဘာတစ်ဝန်းရှိ ဝူဆောင်း၏ ဆာဗာများကို စတင်လှုပ်ရှားစေသည်။ သူ၏ ဘစ်ကွိုင်များမှာ လျင်မြန်စွာ ရောင်းထွက်သွားပြီး ဈေးနှုန်းများ စတင်ကျဆင်းလာသည်။
ချိုဂီချူလ်တစ်ယောက် ဘာတွေဖြစ်နေမှန်း သိသွားသည့်အခါ မည်သို့သောမျက်နှာထား ဖြစ်နေမည်ကို ဝူဆောင်း တွေးကြည့်မိသည်။ သူ မရယ်မိဘဲ မနေနိုင်ပေ။ ချိုဂီချူလ်သည် ပိုက်ဆံအားလုံး ဆုံးရှုံးရတော့မည်။
“ဟားဟား၊ ငါတော့ စောင့်မရတော့ဘူး။ ငါမင်းကို ထောင်ထဲ ပို့ပေးမယ်။ ဂျောင်ဂျင်စပ်ကိုလည်း အတူတူပဲ။”
1BTC 25.50။
1BTC 28.10။
1BTC 16.10။
1BTC 20.10။
ဝူဆောင်းသည် ကွန်ပျူတာကို ပိတ်လိုက်ပြီး အခန်းထဲမှ ထွက်လာခဲ့သည်။ သူနှင့် ကမ္ဘာ့ထိပ်တန်း ငွေကြေးအဖွဲ့အစည်းများမှ တာဝန်ရှိသူများအတွက် နေ့လယ်စာစားပွဲကို ပြင်ဆင်ထားပြီးဖြစ်သည်။
***
ချိုဂီချူလ် ရုံးသို့ ပြန်ရောက်ပြီး ကွန်ပျူတာကို စစ်ဆေးကြည့်လိုက်သောအခါ သူ ထပ်မံ၍ တုန်လှုပ်သွားရပြန်သည်။ သူ ဆေးလိပ်သောက်ရန် မထွက်ခင်က ၃၁.၆၀ ရှိနေရာမှ ယခု ပို၍ပင် နိမ့်ကျသွားပြီဖြစ်သည်။ မိနစ် ၂၀ အတွင်းမှာပင် ဈေးနှုန်းမှာ ၅ ဒေါ်လာအထိ ကျဆင်းသွားသည်။
သူ ကြည့်နေစဉ်မှာပင် ဈေးနှုန်းမှာ ၃ ဒေါ်လာအထိ ထပ်ကျသွား၏။
“သ… သုံးဒေါ်လာ။”
တစ်ချိန်က ဘီလီယံ ၂၀၀၀ တန်ဖိုးရှိခဲ့သော သူ့အကောင့်မှာ ယခု ၇.၃ သန်းသာ ကျန်ရှိတော့သည်။ ချိုဂီချူလ်တွင် နောက်ဆုံး အခွင့်အရေးတစ်ခု ကျန်သေးသည်။ သူသည် BitMain အကောင့်နှင့် ပြည်ပပိုက်ဆံအိတ်များမှ ဒင်္ဂါးအားလုံးကို Bit Trading အကောင့်ထဲသို့ ရွှေ့လိုက်သည်။
အကယ်၍ သူသာ နောက်ဆုံးအနေဖြင့် ငွေအားလုံးကို ထည့်လိုက်မည်ဆိုလျှင် ဈေးနှုန်းကို အတင်းဆွဲတင်နိုင်မည်ဖြစ်သည်။
ညနက်ပိုင်းတွင် ရုံးခန်းအတွင်း၌။
ဂျောင်ဂျင်စပ်သည် အွန်လိုင်းတွင် ကြေညာချက်တစ်ခု တင်လိုက်သည်။
ခေါင်းစဉ် - ငွေကြေးလွှဲပြောင်းမှု ရုတ်တရက် မြင့်တက်လာခြင်းကြောင့် ဆာဗာစစ်ဆေးခြင်း။
အကြောင်းအရာ - မင်္ဂလာပါ။ ဘစ်ကွိုင်အရောင်းအဝယ် ရုတ်တရက် မြင့်တက်လာခြင်းကြောင့် ကျွန်ုပ်တို့၏ စနစ်ကို အရေးပေါ် ပြုပြင်ထိန်းသိမ်းမှု လုပ်ဆောင်သွားပါမည်။ အရောင်းအဝယ်အားလုံး ခေတ္တရပ်ဆိုင်းထားပါမည်။ စိတ်ရှည်ပေးကြပါရန်နှင့် နားလည်ပေးကြပါရန် ကျေးဇူးတင်ရှိပါသည်။
ဤကြေညာချက် ထွက်လာသည်နှင့်တစ်ပြိုင်နက် အမျိုးမျိုးသော ဒင်္ဂါးအရောင်းအဝယ်ဖိုရမ်များတွင် အပြုသဘောဆောင်သော မှတ်ချက်များဖြင့် ပြည့်နှက်သွားသည်။
“Bit Trading က ဘစ်ကွိုင်ဈေးကို ထပ်ဆွဲတင်တော့မယ်။ ဒီတစ်ခါတော့ ၅၀၀ ရာခိုင်နှုန်း တက်မယ်လို့ ငါလောင်းရဲတယ်။”
“ဘယ်လောက်တောင် ညံ့တဲ့ စီမံခန့်ခွဲမှုအဖွဲ့လဲ။ မကြာသေးခင်က ဆုံးရှုံးမှုကို ပြန်ဆယ်ဖို့ ကြိုးစားနေတာ ဖြစ်မယ်။”
“ဒါ ငါတို့အတွက် အခွင့်အရေးပဲ! အခုပဲ Bit Trading ကို သွားပြီး ဝယ်ကြ၊ ဝယ်ကြ၊ ဝယ်ကြ! ဈေးတက်တော့မယ်!”
လူတို့သည် အရင်တစ်ခါ ဖြစ်ပျက်ခဲ့သည်ကို မှတ်မိနေကြသည်။ ရပ်ဆိုင်းလိုက်ပြီးနောက် Bit Trading တွင် ဘစ်ကွိုင်ဈေးနှုန်းမှာ အရှိန်အဟုန်ဖြင့် တက်သွားခဲ့သည်လေ။
ဂျောင်ဂျင်စပ်သည် ဂဏန်းများကို စစ်ဆေးကြည့်ပြီး ချိုဂီချူလ်ကို ပြောလိုက်သည်။ “အခု ကျွန်တော်တို့ စနစ်ထဲကို ငွေတွေ အများကြီး ဝင်လာနေတယ်။ ပုံမှန်ထက် ဆယ်ဆလောက် ပိုများတယ်။ ဒီအတိုင်းဆိုရင် ဈေးနှုန်းကို ဆယ်ဆလောက်အထိ ဆွဲတင်နိုင်မှာပါ။”
“အဲ့ဒါ မလုံလောက်သေးဘူး။ အနည်းဆုံး အဆတစ်ရာလောက်တော့ ဖြစ်ရမယ်။”
အဲ့ဒီလိုဆိုရင် သူတို့ ၁၀,၀၀၀ ရာခိုင်နှုန်း အမြတ်ရလိမ့်မည်။
ဂျောင်ဂျင်စပ် တံတွေးမြိုချလိုက်သည်။ သူ အရာအားလုံး ဆုံးရှုံးပြီးကတည်းက ရင်းနှီးမြှုပ်နှံမှု မလုပ်တော့သော်လည်း ဤသည်မှာ သူ့အခွင့်အရေးပင်။ ဝူဆောင်းက သူ့ကို ထိုကိစ္စတွင် မပါဝင်ရန် သတိပေးထားသည်။ အကယ်၍ ဂျောင်ဂျင်စပ်သာ ဘစ်ကွိုင်လောင်းကစားမှုတွင် ထပ်ပါဝင်မိပါက သူ့ကြွေးမြီကို ပြန်ဆပ်ပေးမည်မဟုတ်ဟု ပြောထားသည်။
သို့သော် ဤသည်မှာ အလွန်ကောင်းမွန်သော အခွင့်အရေးဖြစ်သည်။
‘ကိစ္စမရှိပါဘူး၊ သူ ဘယ်တော့မှ သိမှာမဟုတ်ဘူး။ ငါ့အတွက် ပိုက်ဆံနည်းနည်းတော့ ရှာမှဖြစ်မယ်။ ဒါက လိမ်ညာထားတဲ့ ဂိမ်းတစ်ခုပဲ၊ ဒီအခွင့်အရေးကို ငါ လက်လွှတ်မခံနိုင်ဘူး။’
ဂျောင်ဂျင်စပ်သည် သူ့ပိုက်ဆံ ဒေါ်လာ ၅၀၀,၀၀၀ ကို စနစ်ထဲသို့ ထည့်လိုက်သည်။
“ပြီးပြီ။”
ဂျောင်ဂျင်စပ်က အချက်ပြလိုက်သည်နှင့် ချိုဂီချူလ်သည် ဖုန်းကို အမြန်ခေါ်လိုက်သည်။ သူသည် ဤတစ်ခါတွင် ကျွမ်းကျင်သူအဖွဲ့ကို အသင့်ပြင်ထားပြီးဖြစ်သည်။ ဖုန်းခေါ်ပြီးနောက် ဇယားကွက်မှာ စတင်လှုပ်ရှားလာသည်။
ချိုဂီချူလ်သည် ဈေးနှုန်း ခုန်တက်လာမည့်အချိန်ကို စောင့်နေသည်။
“ဟင်?”
ဂျောင်ဂျင်စပ်က မေးလိုက်သည်၊ “ဘာဖြစ်လို့လဲ။”
“ခဏလေး စောင့်ဦး။”
ချိုဂီချူလ်သည် ဖုန်းကို ထပ်ကိုင်လိုက်သည်။
***
ဝူဆောင်းသည် သူ့မော်နီတာကို ကြည့်ရင်း ပြုံးလိုက်သည်။
“ဟား! သူက ဒေါ်လာ သန်းအနည်းငယ်လောက်နဲ့ ဈေးနှုန်းကို ထိန်းချုပ်မလို့လား?”
ဝူဆောင်းသည် အရင်ကတည်းက သူ၏ ဘစ်ကွိုင်များကို Bit Trading အကောင့်ထဲသို့ ရွှေ့ထားပြီးဖြစ်သည်။ ဝူဆောင်းသည် ၎င်းတို့ကို အမြန်ရောင်းထုတ်လိုက်သည်။
“ငါ့ဆီမှာ ဘစ်ကွိုင် တစ်သန်းကျော် ရှိတယ်လေ။”
ချိုဂီချူလ်၏အဖွဲ့သည် ဈေးနှုန်းကို တက်အောင် ကြိုးစားသော်လည်း ဝူဆောင်းက သူတို့၏ ကြိုးပမ်းမှုတိုင်းကို ဟန့်တားနေသည်။
၁၂ နာရီ ကြာပြီးနောက်တွင် ဈေးနှုန်းမှာ ၁၀၀၀ ဒေါ်လာပင် မရောက်နိုင်တော့ပေ။