အခန်း ၁၅၇။ <အဓိကပွဲစပြီ>
“အစိုးရအနေနဲ့ ကိုရီးယားရဲ့ စတုတ္ထမြောက် မိုဘိုင်းတယ်လီကွန်းလုပ်ငန်းသစ်ဖြစ်တဲ့ XFeed ကို ဂုဏ်ယူစွာနဲ့ မိတ်ဆက်ပေးလိုက်ပါတယ်။ ပြည်သူတွေအနေနဲ့ ဖုန်းဘေလ်ခတွေ သက်သာလာမယ့် အကျိုးကျေးဇူးကို မကြာခင်မှာပဲ ခံစားရတော့မှာပါ။ XFeed ရဲ့ CEO ကတော့ Coconut နဲ့ KND တို့ရဲ့ ပိုင်ရှင်ဖြစ်သူ နာမည်ကျော် ကန်ဝူဆောင်းပဲ ဖြစ်ပါတယ်။ သူက ဒီစီမံကိန်းအတွက် အံ့အားသင့်စရာကောင်းတဲ့ ဘတ်ဂျက် အမေရိကန်ဒေါ်လာ ၁၅ ဘီလီယံကို တင်သွင်းထားပါတယ်”
ထိုသတင်း ပျံ့နှံ့ပြီးနောက်ပိုင်း ဝူဆောင်းသည် Daenam Constructions ကို ဝယ်ယူလိုက်ပြန်သည်။ Daenam သည် ကိုရီးယား၏ တတိယအကြီးဆုံး ဆောက်လုပ်ရေးကုမ္ပဏီဖြစ်ခဲ့သော်လည်း ငွေကြေးအကျပ်အတည်းကြောင့် အမြတ်အစွန်း နည်းပါးစွာဖြင့်သာ ရုန်းကန်နေရသည်။ ဝူဆောင်းက ထိုကုမ္ပဏီကို ဒေါ်လာ ၃ ဘီလီယံဖြင့် ဝယ်ယူနိုင်ခဲ့သည်။
မီဒီယာများက ဝူဆောင်း တစ်ခုခု မှားယွင်းသွားပြီဟု သုံးသပ်ကြသော်လည်း သူကမူ “ကျွန်တော့်မှာ ဘာမဆို ဝယ်နိုင်တဲ့ ငွေကြေးပမာဏ ရှိပါတယ်။ ပြဿနာက ကျွန်တော် ဝယ်ချင်တဲ့ ကုမ္ပဏီမျိုးက ရှားပါးနေတာပဲ” ဟု ပြန်လည်ဖြေကြားခဲ့သည်။
နောက်တစ်ဆင့်မှာ ကြိမ်နှုန်း (Frequency) လေလံပွဲဖြစ်သည်။
ဝူဆောင်းအတွက် ၁.၈ GHz ကြိမ်နှုန်းမှာ အလွန်အရေးပါနေသည်။
၎င်းကို ရွှေရောင်ကြိမ်နှုန်းဟု ခေါ်ဆိုကြသည်။ ကမ္ဘာတစ်ဝန်းလုံးတွင် LTE အတွက် အသုံးအများဆုံး ကြိမ်နှုန်းလည်း ဖြစ်သည်။
ဂျန်ဂွမ်ချူလ်က ဝူဆောင်းကို “အနိုင်ရတဲ့အထိ ဆက်ပြီး လေလံဆွဲသွားမယ့်ပုံပဲနော်” ဟု မေးသည်။
ဝူဆောင်း ခေါင်းညိတ်လိုက်သည်။ “ကျွန်တော် ဒေါ်လာ ၅ ဘီလီယံအထိတော့ အဆုံးအဖြတ်ထားတယ်”
ဂျန်ဂွမ်ချူလ်မှာ အံ့အားသင့်မှုကို မနည်းထိန်းထားရသည်။ ယခင်က TK ကုမ္ပဏီသည် ဒေါ်လာ သန်း ၉၉၀ ဖြင့် လေလံအောင်ခဲ့ဖူးသည်။ ဝူဆောင်းကတော့ ဒီတစ်ခါ TK ကို အနိုင်ပေးမည်မဟုတ်ပေ။
ဂျန်ဂွမ်ချူလ်က ဝူဆောင်းကို “ဟေ့ကောင်၊ လေလံပွဲဆိုတာ ဘယ်လိုမျိုးလဲဆိုတာ မင်းသိသားပဲ” ဟု သတိပေးသည်။
“အချမ်းသာဆုံးလူကပဲ အနိုင်ရမှာပေါ့”
“ဒါပေမဲ့ ငါတို့က Daenam ကို ဝယ်ဖို့ ဒေါ်လာ ၃ ဘီလီယံ သုံးလိုက်ရပြီ။ Pangyo နဲ့ Yongsan မှာလည်း အများကြီး ထပ်သုံးရဦးမယ်။ မိုဘိုင်းလုပ်ငန်းအတွက်လည်း ဒေါ်လာ ၁၅ ဘီလီယံ သုံးထားပြီးပြီလေ”
“အခြေအနေ တင်းကျပ်လာရင် KND ရှယ်ယာတွေကို ပိုရောင်းလိုက်ပေါ့။ အဲဒီကနေ ငွေဘယ်လောက် ထွက်နိုင်လဲဆိုတာ မင်းသိတာပဲ”
ဝူဆောင်းသာ သူ့ရှယ်ယာ ၁၀ ရာခိုင်နှုန်းကို ရောင်းချလိုက်မည်ဆိုလျှင် ဒေါ်လာ ၈ ဘီလီယံအထိ ရရှိနိုင်သည်။
ဂျန်ဂွမ်ချူလ်က “သိပါတယ်” ဟု ရေရွတ်လိုက်သည်။
KND နှင့် Coconut။
ဂျန်ဂွမ်ချူလ် ပိုင်ဆိုင်သည့် ထိုကုမ္ပဏီနှစ်ခု၏ ရှယ်ယာတန်ဖိုးမှာ ဒေါ်လာ ၁၀ ဘီလီယံကျော်နေပြီဖြစ်သည်။ ဝူဆောင်းနှင့် မတွေ့ခဲ့ပါက သူ ဘဝတစ်လျှောက်လုံး ရှာဖွေနိုင်မည်မဟုတ်သည့် ပမာဏဖြစ်သည်။
ဝူဆောင်းက ဆက်ပြောသည်။ “TK ကို ကျွန်တော်တို့ တကယ်လုပ်မှာဆိုတာ ပြဖို့ ပထမဆုံးအကြိမ်အဖြစ် ဒေါ်လာ သန်း ၅၀၀ တင်သွင်းမယ်။ အော်... နောက်ပြီးတော့ ငါတို့ မနိုင်ရင်လည်း အဆင်ပြေမယ့် အခြေအနေတစ်ခု ရှိသေးတယ်”
“ဘာ... ဘာပြောတယ်”
“Winner’s curse (အနိုင်ရသူရဲ့ ကျိန်စာ) လေ။ TK က အနိုင်ရသွားပေမဲ့ ငွေအများကြီး သုံးလိုက်ရလို့ နစ်နာသွားမယ်ဆိုရင် XFeed အတွက် ပိုတောင် ကောင်းဦးမယ်”
“ဒီတစ်ခါကော ဘာတွေ ကြံစည်နေပြန်တာလဲ”
“ဒီလေလံပွဲက စိတ်ဝင်စားဖို့ ကောင်းမှာပါ။ တစ်နိုင်ငံလုံးက စောင့်ကြည့်နေကြမှာလေ” ဝူဆောင်းက လျှို့ဝှက်စွာ ရေရွတ်လိုက်သဖြင့် ဂျန်ဂွမ်ချူလ်မှာ ကျောချမ်းသွားရသည်။
***
TK Telecom ရုံးချုပ်၊ ဂျွန်တေးဝမ်၏ ရုံးခန်းအတွင်း။
“XFeed က ပထမအချီအတွက် ဒေါ်လာ သန်း ၅၀၀ တင်သွင်းလိုက်ပါတယ်”
လက်ထောက်၏ တင်ပြချက်ကြောင့် ဂျွန်တေးဝမ် သွားများကို ကြိတ်လိုက်သည်။ “ဒါဆို သူ အတော်လေး ယုံကြည်မှု ရှိနေတာပေါ့”
“သူ့ရဲ့ စုစုပေါင်း ဘတ်ဂျက်က ဒေါ်လာ ၁၅ ဘီလီယံဆိုတော့ ငွေကြေးအတွက် စိုးရိမ်စရာမရှိဘူး။ နောက်ပြီး ကိရိယာတွေကိုလည်း KND ကနေ စျေးသက်သက်သာသာနဲ့ ရထားတယ်တဲ့”
“ဒါဆို သူတို့မှာ ငွေအလုံအလောက် ရှိနေတာပေါ့”
ဂျွန်တေးဝမ် စိုးရိမ်မိသည်။ ခဏမျှ စဉ်းစားပြီးနောက် သူက ဆက်ပြောသည် “ငါတို့ အများဆုံး သုံးနိုင်တာ ဒေါ်လာ ၁.၅ ဘီလီယံပဲ။ ဒါပေမဲ့ ၁.၈ GHz ကို မရရင် ပြဿနာတက်လိမ့်မယ်”
“ဟုတ်ကဲ့၊ အဲဒါ မှန်ပါတယ်။”
ဂျွန်တေးဝမ် သက်ပြင်းရှည်ကြီး ချလိုက်သည်။ ဘာလုပ်ရမှန်း မသိတော့ပေ။
“ဒေါ်လာ သန်း ၆၀၀ တင်ထားလိုက်၊ ဘာဆက်ဖြစ်မလဲ ကြည့်တာပေါ့”
လက်ထောက်က ခေါင်းညိတ်ပြီး ဖုန်းခေါ်ဆိုလိုက်သည်။ ထိုအချိန်တွင် ဂျွန်တေးဝမ်က တီဗွီပေါ်ရှိ ကြော်ငြာကို သတိထားမိသွားသည်။
“4G လိုချင်ရင် XFeed ကပဲ ရွေးချယ်စရာပါ”
“ကိုရီးယားရဲ့ အမြန်ဆုံး 4G အင်တာနက်”
“Blue S3 4G ရပါပြီ။ XFeed ကို ရွေးချယ်လိုက်ပါ!”
လေလံပွဲက အခုမှ စတင်နေတာဖြစ်ပေမဲ့ XFeed ကတော့ အနိုင်ရပြီးသားအတိုင်း ကြော်ငြာတွေ လွှင့်နေသည်။ ဂျွန်တေးဝမ်မှာ သည်းမခံနိုင်တော့ပေ။
၂ ရက်အကြာ။
ဂျွန်တေးဝမ်၏ လက်ထောက်က ရုံးခန်းထဲသို့ အလောတကြီး ပြေးဝင်လာသည်။ ချွေးများ ပြန်နေလျက် သတင်းစကား ပါးလိုက်သည်။
“ဒေါ်လာ သန်း ၈၀၀။ သူ ဒေါ်လာ သန်း ၈၀၀ တင်သွင်းလိုက်ပါတယ်”
ဂျွန်တေးဝမ် နှုတ်ခမ်းကို ဖိကိုက်လိုက်သည်။
‘ဒီကောင် အရူးပဲ။ အခုမှ တတိယအချီပဲ ရှိသေးတာကို’
လေလံပွဲက အစပျိုးရုံသာ ရှိသေးသော်လည်း ကန်ဝူဆောင်းက ဈေးကို အလွန်မြန်မြန် တင်နေသည်။ ဂျွန်တေးဝမ်၏ ကန့်သတ်ချက်နားသို့ ရောက်လုနီးပါး ဖြစ်နေပြီ။
“တခြားသူတွေကကော ဘယ်လိုလဲ”
“KG ကတော့ ရွှေရောင်ကြိမ်နှုန်းကို လက်လျှော့လိုက်ပုံရပါတယ်။ သူတို့ ဘတ်ဂျက်က ဒေါ်လာ ၁ ဘီလီယံအောက်မှာပဲ ရှိမယ်ထင်တယ်”
“ငါတို့ ဒေါ်လာ ၁.၅ ဘီလီယံအထိ တိုးလို့ရတယ်” ဂျွန်တေးဝမ် ဆုံးဖြတ်ချက် ချလိုက်သည်။
“ဒေါ်လာ ၁ ဘီလီယံ တင်လိုက်။ သူ ဘယ်လောက်အထိ တက်နိုင်မလဲ ကြည့်ရအောင်”
“ဗျာ... အကြီးအကဲ”
“ပြီးတော့ ရန်ပုံငွေတွေ ထပ်ရှာထား။ ဒီလေလံကို ငါတို့ မဖြစ်မနေ အနိုင်ယူရမယ်”
“ဟ… ဟုတ်ကဲ့ပါ”
နောက်တစ်နေ့။
“အနိုင်ရသူက ကျိန်စာသင့်တော့မလား”
“လေလံဈေးက ဒေါ်လာ ၁ ဘီလီယံအထိ ရောက်နေပါပြီ၊ ၄ ရက်ပဲ ရှိပါသေးတယ်။ ဒီရွှေရောင်ကြိမ်နှုန်းကို ဘယ်သူ အနိုင်ရသွားမလဲ”
တစ်နိုင်ငံလုံး၏ ပြောစမှတ် ဖြစ်နေသည်။ ဂျွန်တေးဝမ်မှာ စိတ်လှုပ်ရှားစွာဖြင့် ရုံးခန်းထဲတွင် အသွားအပြန် လမ်းလျှောက်နေသည်။
အေးစက်နေသော ရာသီဥတု ဖြစ်သော်လည်း ချွေးများ ပြန်နေသည်။ ဒေါသနှင့် စိတ်ပျက်မှုတို့ကြောင့် စားပွဲကို ကန်လိုက်သည်။
နောက်ဆုံးတွင် လက်ထောက်က ရုံးခန်းထဲသို့ ပြေးဝင်လာပြန်သည်။
“ကန်ဝူဆောင်းက... ဒေါ်လာ ၁.၅ ဘီလီယံ တင်သွင်းလိုက်ပါတယ်”
ဂျွန်တေးဝမ် မျက်လုံးကို မှိတ်လိုက်သည်။ ၁.၅ ဆိုသည်မှာ သူ့၏ အမြင့်ဆုံး ကန့်သတ်ချက်ဖြစ်သည်။
“ဒီကောင်...”
“အကြီးအကဲ... ဒေါ်လာ ၁.၆ ဘီလီယံလောက် ထပ်တင်ရမလား”
လက်ထောက်၏ အသံမှာ တုန်ရီနေသည်။ ထိုပမာဏကို သူတို့ မတတ်နိုင်သော်လည်း ဂျွန်တေးဝမ် ခေါင်းညိတ်လိုက်သည်။
“လုပ်လိုက်”
“ဒါပေမဲ့ သူတို့သာ နောက်ပိုင်း လက်လျှော့သွားရင်...”
“ရတယ်၊ ငါတို့ တတ်နိုင်တယ်။ ချေးငွေသာ ယူလိုက်ရင် ဒေါ်လာ ၂ ဘီလီယံအထိတောင် တက်လို့ရတယ်”
***
ဂျန်ဂွမ်ချူလ် တံတွေးမြိုချလိုက်သည်။
“ဒေါ်လာ ၂ ဘီလီယံ...”
“ရောက်တော့မှာပါ”
“ကျိန်စာမိတော့မှာပဲ”
ဝူဆောင်း မေးစေ့ကို ပွတ်လိုက်သည်။ လေလံဈေးမှာ ဒေါ်လာ ၂ ဘီလီယံအထိ ရောက်သွားပြီဖြစ်သည်။
ယခင်ဘဝတွင် TK က ၁.၈ GHz ကို ဒေါ်လာ ၁ ဘီလီယံနီးပါးဖြင့် အနိုင်ရခဲ့သည်။ ဝူဆောင်းက “ဒီကြိမ်နှုန်းက ဒီလုပ်ငန်းမှာ အမှန်တကယ် အကျိုးရှိစေမှာပါ။ Coconut နဲ့ Blue S လို အောင်မြင်တဲ့ ကုမ္ပဏီတွေ ရှိပေမဲ့ မိုဘိုင်းလုပ်ငန်းမှာတော့ ကျွန်တော်တို့က အသစ်စက်စက်တွေပဲ။ TK က ဈေးကွက်ရဲ့ တစ်ဝက်ကို ပိုင်ထားတော့ သူတို့ဆီက ဝယ်သူတွေကို လုယူဖို့ ဒီကြိမ်နှုန်းက လိုအပ်တယ်” ဟု ပြန်ပြောသည်။
“ဒီရွှေရောင်ကြိမ်နှုန်းနဲ့ဆိုရင် ကျွန်တော်တို့က လူအာရုံစိုက်မှုတွေ၊ ကြော်ငြာအခမဲ့တွေကို အများကြီး ရရှိမှာပါ”
“မှန်တယ်၊ အသုံးပြုသူအသစ်တွေကိုလည်း မြန်မြန်ဆန်ဆန် ရလာမယ်”
ဂျန်ဂွမ်ချူလ် ခေါင်းညိတ်လိုက်ပြီး “ဝန်ဆောင်မှုတောင် မစရသေးဘူး၊ XFeed အသုံးပြုသူ ၁၀,၀၀၀ ကျော်တောင် ရနေပြီ။ လူတွေက ကျွန်တော်တို့ကိုပဲ အနိုင်ရစေချင်နေကြတာ” ဟု ထောက်ခံသည်။
သူတို့အတွက် ဒီကြိမ်နှုန်းက မဖြစ်မနေ လိုအပ်သည်။
***
ဒေါ်လာ ၂ ဘီလီယံဆိုသည်မှာ များလွန်းသည်။ ဂျွန်တေးဝမ် စိတ်လှုပ်ရှားစွာဖြင့် အသွားအပြန် လမ်းလျှောက်နေသည်။
“၂ ဘီလီယံ... ၂ ဘီလီယံ... အဲဒီ အရူးကောင်က... ဒေါ်လာ ၂ ဘီလီယံတဲ့!”
“သူ ဒေါ်လာ ၃ ဘီလီယံအထိတောင် တက်ဖို့ စဉ်းစားနေပုံရတယ်”
ဂျွန်တေးဝမ် ပါးစပ်အဟောင်းသား ဖြစ်သွားသည်။ “ကြိမ်နှုန်းတစ်ခုအတွက်နဲ့လား”
“သူတို့ ဒါကို ရရင် ဝယ်သူတွေ အများကြီး ဆွဲဆောင်နိုင်မယ်ဆိုတာ သူတို့ သိနေတယ်လေ”
ဂျွန်တေးဝမ် မျက်လုံးကို မှိတ်လိုက်သည်။ သူ ဆက်ပြီး လမ်းလျှောက်နေမိသည်။ ဘာလုပ်ရမလဲ။ ထပ်ပြီး လေလံဆွဲမလား... ဒါမှမဟုတ် ရပ်လိုက်မလား။
ရုတ်တရက် လက်ထောက်၏ ဖုန်းမြည်လာသည်။ Daeyang က ဖြစ်သည်။
“ဟယ်လို၊ Daeyang ကနေ ချွန်ဂီဆူး ပြောတာပါ။”
“...ဟုတ်ကဲ့”
“အခု ကြိမ်နှုန်းလေလံပွဲမှာ အခက်အခဲလေးတွေ ရှိနေတယ်လို့ ကြားမိတယ်။ Daeyang ဘက်က ကူညီပေးနိုင်မလားလို့ပါ”