"ဒါပေမဲ့ မင်းက လုအစ်မနဲ့ အဲ့ဒီလိုလုပ်ခဲ့တာပဲ။ ဟူးဟူး... မင်းငါ့ကို မကြိုက်တော့ဘူးမလား၊ ဟူးဟူး" ချင်းဟွေဖန်းက သူ့ကို ငြင်းပယ်လိုက်ပြီဟု ခံစားရကာ သူမ၏ အပြစ်ကင်းစင်မှု ဆုံးရှုံးသွားကြောင်း သက်သေပြသည့်နှယ် ငိုကြွေးလေသည်။
"ဘာ... ဘယ်အစ်မလဲ၊ လူမိုက်၊ မင်း ဘယ်သူနဲ့ အဲ့ဒီလိုလုပ်ခဲ့တာလဲ" စုလင်း က အမတစေတီ ပေါ်မှနေ၍ ဒေါသတကြီး အော်ဟစ်လိုက်သဖြင့် ဖေး မှာ အကြပ်ရိုက်သွားရသည်။ သူမ အဘယ်ကြောင့် ဤသို့ ပြုမူနေသည်ကို သူ နားလည်သည်။ သူမ၏ သစ္စာတရားမှာ စစ်မှန်သော အချစ်အဆင့်တွင် ရှိနေသည်ဖြစ်ရာ ဖေး အနေဖြင့် မည်သို့ နားမလည်ဘဲ ရှိနိုင်ပါမည်နည်း။ သို့သော် သူ နားမလည်နိုင်သည်မှာ မည်သို့ ဖြစ်ပျက်ခဲ့သနည်းဟူသည်ထက် သူမတွင် အဘယ်ကြောင့် ထိုမျှ ပြင်းထန်သော သစ္စာတရား ရှိနေရသနည်းဟူသည့် အချက်ပင် ဖြစ်သည်။ သို့သော် ချင်းဟွေဖန်းမှာ အသံထွက်၍ ငိုကြွေးနေသဖြင့် ဖေး တွင် သူမနှင့် အငြင်းပွားရန် အချိန်မရှိချေ။
"ချင်းဟွေဖန်း၊ ဒါက မကြိုက်တာ မဟုတ်ဘူး။ တကယ်တော့ ငါ့မှာ ဟာရမ် (အမျိုးသမီးများစုဝေးရာနေရာ) တည်ဆောက်ဖို့ အိပ်မက်ရှိနေတာကို ငါက ဘယ်လိုလုပ်ပြီး လှပတဲ့သူတွေကို မကြိုက်ဘဲ နေနိုင်မှာလဲ။ ဒါပေမဲ့ ငါတို့က အသက်မပြည့်သေးဘူးလေ။ ငါတို့ အချစ်ကနေ စတင်ပြီးမှ တဖြည်းဖြည်းနဲ့ လက်ထပ်တဲ့အထိ သွားကြတာပေါ့" ဖေး သည် နဖူးမှ ချွေးစက်များကို သုတ်ရင်း ရှင်းပြနေရသည်။ သူ တတ်နိုင်သမျှ အကောင်းဆုံး ရှင်းပြရင်း သူ၏ အိပ်မက်ကိုပင် သူမအား ဝေမျှလိုက်သည်။
"လူမိုက် ဖေး၊ မင်း ဘယ်မိန်းကလေးကိုမှ..." ဖေး ၏ အိပ်မက်အကြောင်း ကြားလိုက်ရသောအခါ စုလင်း က သူ့အား လှမ်းအော်လိုက်သော်လည်း သူမ ဘာကြောင့် ဝင်ပါနေမိမှန်း မသိသဖြင့် စကားကို ရပ်လိုက်သည်။ ဖေး က သူမအကြောင်းကိုမှ မသိတာပဲလေ။
"တကယ်လား" ချင်းဟွေဖန်းက မျက်ရည်များကို သုတ်ရင်း မေးလိုက်သည်။ သူမ၏ မျက်နှာပေါ်တွင် ပွင့်လန်းလာသော အပြုံးမှာ ရင်ခုန်သံပေါင်းများစွာကို တုန်လှုပ်သွားစေနိုင်သည်။
"ဟုတ်တာပေါ့၊ ငါတို့ အချစ်ကနေ စကြတာပေါ့။ ခံစားချက်တွေကို မျှဝေတာ၊ Date (ရက်ချိန်း) သွားတာ၊ ရိုမန်တစ်ဆန်တဲ့ အချိန်တွေကို အတူတူ ဖြတ်သန်းတာမျိုးပေါ့" ဖေး သည် ကမ္ဘာမြေသားတို့၏ အချစ်အမြင်အပေါ် အခြေခံထားသည့် သူ၏ အသိပညာအားလုံးကို အသုံးချ၍ သူမအား ရှင်းပြလိုက်သည်။
"Date?" ချင်းဟွေဖန်းမှာ ထိုစကားလုံးကို နားမလည်သလို စုလင်း မှာလည်း အတူတူပင် ဖြစ်သည်။
"ဟုတ်တယ်၊ Date သွားတယ်ဆိုတာ ချစ်သူတွေက လှပတဲ့နေရာတွေကို သွားလည်တာ၊ အတူတူ အချိန်ဖြုန်းတာ၊ ဈေးဝယ်ထွက်တာမျိုးတွေကို ပြောတာ" ဖေး က အလျင်စလို ရှင်းပြလိုက်သော်လည်း စိတ်ထဲတွင် ပြန်တွေးမိသည်။ 'ငါ့မှာ တကယ်ပဲ အဲ့ဒီအတွက် အချိန်ရှိပါ့မလား။ မရဘူး၊ ငါ အချိန်ပေးရမယ်၊ ပြီးတော့ ငါ့ညီအစ်ကိုတွေနဲ့လည်း အချိန်ဖြုန်းရဦးမယ်။'
"ဈေးဝယ်ထွက်တာလား" ရုတ်တရက် ချင်းဟွေဖန်းက မျက်လုံးများ တောက်ပလာကာ ပျော်ရွှင်စွာ အော်ဟစ်လိုက်သည်။
'နေရာဘယ်လောက်ပဲ ပြောင်းပြောင်း မိန်းကလေးတွေရဲ့ ဈေးဝယ်ချင်တဲ့စိတ်ကတော့ ပြောင်းမှာမဟုတ်ဘူး။ ကံကောင်းတာက ငါ အခု သန်မာနေပြီပဲ' ဖေး သည် သူ ကိုင်ထားရတော့မည့် ဈေးဝယ်အိတ်များကို တွေးကာ ပြုံးလိုက်သည်။ ထို့နောက် ရုတ်တရက် သူမအနီးသို့ တိုးကပ်သွားကာ သူမ၏ နှုတ်ခမ်းပေါ်သို့ သူ၏ နှုတ်ခမ်းကို ဖိကပ်လိုက်သည်။
ချင်းဟွေဖန်းမှာ စိတ်လှုပ်ရှားလွန်း၍ သတိလစ်မတတ် ဖြစ်သွားသော်လည်း စုလင်း ကမူ မျက်လုံးများကို မှိတ်လိုက်ကာ သူ့အား ကျိန်ဆဲနေသည်။ နောက်ဆုံးတွင် ဖေး သည် နှုတ်ခမ်းကို ခွာလိုက်ပြီး "ဒါက အစပဲရှိသေးတယ်။ သွားကြစို့" ဟု ပြောလိုက်သည်။
ဖေး သည် သူမ၏ ခါးကို ဖက်လိုက်ပြီး လေနဂါးခြေလှမ်း ကို စီးကာ အဆူရာနဂါးအဖွဲ့ အဖွဲ့ဝင်များ ရှိရာသို့ ဦးတည်သွားလေသည်။